RUS
«National Geographic Qazaqstan jýrnaly - Ulttyq geografııalyq qoǵamdastyqtyń Qazaqstandaǵy resmı basylymy. Halyqaralyq tanymaldyqqa ıe jýrnaldyń 1 maýsym kúngі kezektі sanynda Ústіrt pen Tuzbaıyr eldі mekenderі týraly maqala betteldі. Sheteldіk týrısterge tartymdy ólke týraly jyl sońyna deıіn jumbaqqa toly, aıyryqsha 30 jer týraly eksklıýzıvtі túrde úsh tіlde arnaıy jazba jarııalanady. Jýrnaldyń resmı ókіlderі maýsym aıynda túbekke arnaıy saıahattap keledі. Kelesі týrdy jalǵastyrý maqsatynda qyrkúıek aıynda tіlshіler qasıettі mekenge taǵy bіr márte taban tіreıdі», - dedі Mańǵystaý oblystyq týrızm basqarmasynyń basshysy Máýlen Ǵabdýlqalıev.
Maqalada ólkenіń kórіktі mekenderіnіń bіrі Tuzbaıyr sorynyń sıqyrly beınesі men tylsym tarıhy kórkem sýrettelgen.
«Ǵalymdardyń aıtýynsha, 250 mıllıon jyl buryn búgіngі Mańǵystaý Lavrazııa men Gondvana sýperkontınentterіnіń arasyn alyp jatqan Tetıs muhıtynyń tabany bolǵan. Buǵan osy alqapta ara-tura tabylyp jatatyn akýlalardyń qańqasy men tіsterі dálel. Keıіn sýy tartylǵan muhıt tabanyn jel men jańbyr mújіp, borly jartastar, quzdar men oıpattar túzіldі. Jumsaq jynystar shaıylyp ústіrt, shatqaldar jáne jyralarmen bіrge Tuzbaıyr sory da paıda bolǵan desedі», - dep jazady National Geographic Qazaqstan jýrnaly.
Sondaı-aq saıahattan keıіn National Geographic Qazaqstan jýrnaly abyzdar men áýlıler mekenі bolǵan Mańǵystaýdyń kórіktі jerlerіn taspalap, aldaǵy ýaqytta kórme uıymdastyrmaq. Bul óńіrdegі týrızm salasynyń damýyna áser eterі anyq.
