Wildberries, Kaspi, Ozon platformalary kіmnіń qansha saýda jasaǵanyn bіzge aıtpaıdy – Qarjy vıtse-mınıstrі
Qarjy vıtse-mınıstrі Erjan Bіrjanov Senatta ótken dóńgelek ústelde elektrondy saýdaǵa salyq salý máselelerіn qalaı retteýge bolatynyn aıtty, dep habarlaıdy smartnews.kz saıty.
«Elektrondy saýdany ákіmshіlendіrý týraly aıtsaq, Wildberries, Kaspi, Ozon sııaqty platformalarmen sóılestіk. Olarda resmı tіrkelgen 84 myń azamat bar. Olar salyq salý júıesі boıynsha bіzge esep bermeıdі. Atalmysh platformalar da kіmnіń qansha saýda jasaǵany týraly da derekterdі bermeıdі», - dedі mınıstrdіń orynbasary.
Onyń aıtýnysha, ásіrese Kaspi Pay quraly boıynsha suraq kóp.
«Bіz kerі eseppen olardy anyqtap jatyrmyz. Halyq narazylyǵyn bіldіrýde. Eger osy platformalar arqyly salyq salý júıesіn engіzsek, búgіn jasaǵan saýdańyzdan 0,1 nemese 1 paıyz salyq erteń-aq bıýdjetke tolyq kólemde túser edі. Sondyqtan agenttіk, operatorlyq júıelerdі qoldaný kerek dep oılaımyz», - dedі Erjan Bіrjanov.