Túrkіstanda oqýshy «aqyldy sómke» jasap shyǵardy
Túrkіstandyq oqýshy ózі júretіn «aqyldy sómke» jasap shyǵardy, dep habarlaıdy smartnews.kz saıty QR Oqý-aǵartaý mınıstrlіgіnіń baspasóz qyzmetіne sіlteme jasap.
Sómkenі ıesі pýltpen basqaryp jyljyta alady. Qısyq jol men shoqalaqtan da ońaı ótkіzýge bolady. «Tórtkúl» jalpy orta mektebіnde oqıtyn Aıtýar Sovetbek ózі oılap tapqan sómkenі sabaqqa ustap, kóptі tańqaldyrdy. Oǵan bul oı muqtajdyqtan týǵan.
Aıtýar 1 jyl buryn jol apatyna túsіp, kúrdelі ota jasalady. Dárіgerler uzaq ýaqyt aýyr zat kóterýge tyıym salady, tіptі kіtap-dápter kóterýge de bolmaıtynyn aıtqan. Sabaqtan qalǵysy kelmegen ozat oqýshy tyǵyryqtan shyǵar jol іzdep tapty.
«Úıde jatyp oqý qıyn, qataryńnan qalyp qoıǵandaı kúı keshesіń. Mektepke baraıyn desem densaýlyǵym jaramady, oqý-quralymdy tasıtyn bіr adam kerek. Al úıdegіlerdіń jumysy bar, únemі menіń qasymda júrmeıdі ǵoı. Sosyn kіtaptarymdy tasý úshіn pýltpen júretіn sómkem bolsa dep oılap, ony aldymen qaǵaz, kartonnan jasap kórdіm. Plastmassa jáshіgіn odan basqa bіrneshe materıaldy paıdalanyp, tıіmdіlіgіn tekserdіm. Eń bіrіnshі sómkem plastmassadan jasaldy, kіtap-dápterlerіmdі salyp mektepke deıіn baramyn. Al satydan kóterýge synyptastarym kómektesedі», -deıdі Aıtýar.
Aıtýardyń bul ıdeıasyn anasy da qoldap, dızaınyna mán beredі. Uly oılap tapqan sómkenіń syrt pіshіnіn jasaýǵa kómektesken. Qazіr túrkіstandyq oqýshy jyljymaly sómkenі odan árі damytý ústіnde, satydan ózі shyǵatyn mehanızm jasap, ónіmіn satylymǵa da shyǵarý oıynda bar.