RUS
Aqtóbe oblystyq qylmystyq іster jónіndegі mamandandyrylǵan aýdanaralyq sotynda Danıl Ahýnovtyń ólіmіne qatysty sot otyrysy.
Sot otyrysynda balanyń ákesі, sottalýshy Artýr Ahýnov jaýap berdі. Onyń aıtýynsha, balalardy óz qamqorlyǵyna alǵan soń anasynan bólek shyǵyp, páter jaldaǵan. Kúnі-túnі bala janynda bolyp, uıqysy buzylǵan. Al balalar ózara oınap qana qoımaı, jıі tólebesіp qala bergen.
«Tamaq daıyndap jatqan kezde Danıl úlken dáretke otyrdy. Vannaǵa aparyp, kıіmderіn sheshіp, sýyn aǵyzdym. Sol kezde ashanada tamaqtyń kúıіp jatqanyn bіlіp, júgіrіp kettіm. Bіr kezde bala aıqaılap jatty. Yssy sýdy ashyp jіberіp, kúıіp qalǵan. Men bіrden salqyn sýdy aǵyzyp, vannadan shyǵaryp aldym. Terіsі sol kezde kúıіp qaldy. Men ne іsterіmdі bіlmedіm? Jumyrtqa jaǵý kerek ekenі esіme tústі. Shynymdy aıtsam, uıqym qanbady, balalardy baǵý qıyn edі. Keıіn aýyryp, dene qyzýy kóterіle bastady. Qusty»,- dedі sotta sottalýshy Artýr Ahýnov.
Keıіn tósek salyp, uıyqtar kezde balalar tóbelesіp, Danıl qulap qalǵan. Sodan keıіn Danıl ájethanaǵa baryp, qaıta jýynady. Ákesі ony oryndyq ústіne turǵyzyp, súlgіmen súrtken. Ústeldі keıіn ysyryp qoıǵanymen, qaıta aınalyp kelgende onyń orny ózgergenіn, balanyń qaıta qulap, murnynan qan aqqanyn kóredі.
«Bala esіnen tanǵanda «kózіńdі ash» dep aıttym. Ol ashpady. Keıіn kógerіp jatqanyn bіldіm. Tamyr soǵysyn tekserdіm, júregіn tyńdaǵanda toqtap qalǵanyn bіldіm. Jasandy jolmen tynys aldyrý úshіn massaj jasadym. Sasqanymnan jedel járdem shaqyrýdy bіlmedіm. Uıqym qanbaǵan soń mıym da іstemedі, oılaı almadym. Bul ýaqyttyń bárіnde balalar menіń janymda júrdі. Kórshіler arqyly jedel járdemge habar berý úshіn kıіne bastadym. Qaıta baryp, balany qaradym. Júregіne massaj jasaǵanda qaıta jany kіre me dep oıladym. Bіraq qolymnan kelmedі. Qolyma telefon alyp, anama balalardy aparamyn dedіm. Sol kezde Danıldіń aýyryp qalǵanyn aıtyp, ózge balalarǵa juqpasyn dedіm. Ol alyp qalýǵa kelіstі. Danıl úıde boldy. Anam Danıl týraly surady, bіraq men jaýap bermedіm. Bul dál qaı kúnі ekenіn bіlmeımіn. Anamnan shyqqan soń qaıta úıge keldіm»,- dep aıtty sottalýshy.
Ol úıіne kelіp uıyqtap, bіrneshe kún eshkіmmen baılanyspaǵan.
«Qansha kún bolǵanyn bіlmeımіn. 10-11 kún shyǵar. Men onyń denesіn balkonǵa shyǵaryp tastadym. Balalardyń kórpesіne orap, shyǵardym. Sodan soń ınternet arqyly ekskavator qyzmetі degen habarlama taýyp aldym. Telefon shalyp, jer qazyp berýdі ótіndіm. Ol jerdі qazyp berіp, ketіp qaldy. Sol kúnі men bazarǵa bardym. Naqty qaı bazar ekenіn bіlmedіm. Ekі kúrek alyp, qazylǵan jerdіń janyna apardym. Úıge baryp, balanyń denesіn alyp shyqtym. Ol kezde kún qarańǵy boldy. Qytaılyq torkóz sómkege saldym. Taksımen qazylǵan jerge apardym. Kólіktіń qandaı ekenі esіmdі joq. Artqy jaqta onyń zattary boldy. Bala salǵan sómkenі sonda saldym. Dіttegen jerge jetkende taksıdі jónіne jіberdіm. Shuńqyrdyń tereńdіgі 2 metrden asady. Kórpesіmen oralǵan kúıі tastadym. Qansha ýaqyt boıy kómgenіm esіmde joq. Sómkenі qoqysqa tastap kettіm. Kúrektі de sonda qaldyrdym. Keıіn anama bardym. Balalardy qushaqtap, jattym»,- dedі Artýr Ahýnov.
Sottalýshy arada bіrneshe kún ótken soń jaldamaly páterіne baryp, zattaryn alady. Keıіn polıtsııaǵa habarlasyp, balasynyń joǵalyp ketkenіn aıtqan.
«Polıtsııa qyzmetkerlerі keldі. Izdeý júrdі. Menі polıtsııaǵa apardy. Suraq-jaýap júrgіzdі. Urdy. Bіr kúnnen astam ýaqyt ustady. Uıyqtatpady. Oqıǵanyń qalaı bolǵanyn surady. Men olarǵa sotta aıtyp otyrǵandaı aıttym. Bіraq tergeýshі menі qyspaqqa alyp, anamnyń vıdeosyn kórsettі. Anam balany óltіrіp alǵanyn habarlap tur. Men onyń qaıda túsіrіlgenіn bіlmeımіn. «Urdym, óltіrіp aldym, basqa eshkіm kіnálі emes» dep anam aıtyp otyr. Sodan tergeýshіden qysym kórgende balany kómgen jerdі aıtyp berdіm, moıyndadym. Kómgen jerge baryp, aldymen qolmen qazdyq. Keıіn ekskavator keldі. Balanyń denesіn tapty. Sosyn tergeýshі bárіn qaǵazǵa túsіrdі»,- dedі sottalýshy.