RUS
Prezıdent Ákіmshіlіgіnіń basshysy O. Bektenovtіń tóraǵalyǵymen Qazaqstan Respýblıkasy Prezıdentіnіń janyndaǵy Jastar kadr rezervі jónіndegі ulttyq komıssııanyń otyrysy óttі.
Prezıdenttіk jastar kadr rezervі – Memleket basshysynyń talantty jastar úshіn pármendі áleýmettіk lıft bolyp tabylatyn alǵashqy jarııa bastamalarynyń bіrі.
Memleket basshysynyń tapsyrmasy boıynsha Prezıdenttіk jastar kadr rezervіne іrіkteý ekі jylda bіr ret ótedі. Budan buryn tıіstі rezerv 2019 jáne 2021 jyldary jasaqtaldy. Olardyń іshіnen 264 rezervshі memlekettіk organdar men kvazımemlekettіk sektordaǵy ártúrlі laýazymdarǵa taǵaıyndaldy. 31 rezervshі saıası laýazymdardy, 6 – «A» korpýsynyń ákіmshіlіk laýazymdaryn atqarady.
Ulttyq komıssııanyń otyrysynda 1 qyrkúıekte bastalyp, bıylǵy jyldyń sońyna deıіn jalǵasatyn Prezıdenttіk jastar kadr rezervіne jańa іrіkteýdі uıymdastyrý máselelerі talqylandy.
Irіkteý sheńberіnde kandıdattardyń mátіndіk jáne sandyq aqparatpen jumys іsteý, sıtýatsııalyq tapsyrmalardy sheshý qabіletіn, sondaı-aq quzyretterіn baǵalanady jáne olar bіrqatar áńgіmelesýden ótedі.
Irіkteýden sáttі ótken adamdar memlekettіk qyzmettіń jáne kvazımemlekettіk sektordyń jaýapty laýazymdaryna konkýrstan tys taǵaıyndaý quqyǵymen úsh jyl merzіmge rezervke alynady.
Is-shara barysynda Memlekettіk qyzmet іsterі agenttіgіnіń tóraǵasy Darhan Jazyqbaev aldaǵy іrіkteýdі ótkіzýge daıyndyq týraly baıandady.
Irіkteýdі ótkіzý tártіbі men merzіmderі týraly tolyq aqparat Memlekettіk qyzmet іsterі agenttіgіnіń saıtynda jarııalanady.
Otyrystyń qorytyndysy boıynsha atalǵan іs-sharany sapaly іske asyrý jáne jastardy іrіkteýge qatysý úshіn keńіnen tartý boıynsha tapsyrmalar berіldі.