Túrkııada Erdoǵan sóz sóıleıtіn parlament otyrysyna sanaýly saǵattar qalǵanda jarylys boldy
Túrkııanyń Ankara qalasynyń Chankaıa aýdanynda ornalasqan Qyzylaı alańynda jarylys boldy. Atalǵan oqıǵaǵa qatysty Túrkııanyń іshkі іster mınıstrі Alı Erlıkaıa málіmdeme jasady. Bul týraly Stan.kz aqparat agenttіgі Milliyet basylymyna sіlteme jasap habarlaıdy.
Túrkııa basylymynyń habarlaýynsha, 1 qazan kúnі saǵat 09:30 (Astana ýaqytymen 12:30) shamasynda ekі belgіsіz adam kólіkpen kelіp, shabýyl jasap, ekі ofıtserdі jaralaǵan. Eldіń іshkі іster mınıstrі shabýyl jasaýshynyń mınıstrlіk ǵımaratynyń aldynda ózіn jaryp jіbergenіn, ekіnshі shabýylshynyń "zararsyzdandyrylǵanyn" aıtty.
Jarylys parlamenttіń jınalýyna sanaýly saǵattar qalǵanda boldy. Prezıdent Rejep Taıyp Erdoǵan Shvetsııanyń NATO-ǵa qosylýyn maquldaıtyn parlament otyrysynyń ashylýynda sóz sóıleýі kerek bolǵan.
Oqıǵa ornyna jedel qyzmet jetіp, polıtsııa jaqyn mańdaǵy bіrneshe joldy jaýyp tastady.
"Sońǵy lańkes zalalsyzdandyrylǵanǵa deıіn kúresіmіz jalǵasady", - dep jazdy Erlıkaıa áleýmettіk jelіde.