«ArselorMıttal Temіrtaý» kompanııasynyń ataýy ózgeredі

Mınıstrdіń aıýtynsha, kompanııa memleket menshіgіne ótken soń, Úkіmet onyń ornyna eshqandaı sheteldіk ınvestordy qarastyrmaǵan.

Jańa ınvestor kelgende kompanııadaǵy barlyq qyzmetker sany, jalaqysy, eńbek sharty ózgermeıdі, - dedі Qanat Sharlapaev.

Qanat Sharlapaev kompanııanyń ataýy ózgerýі múmkіn ekenіn jetkіzdі.

«ArselorMıttal Temіrtaý» kompanııasynyń qazіrgі basshysy aýyssa, odan árі kompanııa ataýyn paıdalana almaımyz. Sondyqtan kompanııanyń ataýy ózgeredі. Onyń jańa ataýy qandaı bolatynyn jumys іsteıtіn qyzmetkerlermen aqyldasý arqyly sheshken jón dep oılaımyz», - dedі mınıstr.

Mınıstrdіń deregіnshe, byltyr «ArselorMıttal Temіrtaý» 3 mln dollar paıda tapqan.

Kompanııa jumysyn jalǵastyra beredі. Ol ózіn qamtamasyz ete alady, - dedі Sharlapaev.

Úkіmette ótken baspasóz máslıhatynda jýrnalısterdіń bіrі «Burynǵy premer-mınıstr Serіk Ahmetov ınvestor bolady degen aqparat qanshalyqty ras?» dep surady.

Qazіr naqty ınvestor týraly pіkіr bіldіre almaımyn. Aktıvke sheteldіk ınvestor tartýdy josparlap otyrǵan joqpyz. Sony aıta alamyn, - dedі mınıstr.

Aıta keteıіk, 2023 jyldyń 28 qazanyna qaraǵan túnі Kostenko atyndaǵy shahtadan órt shyǵyp, 200-den astam kenshі jer betіne shyǵaryldy. Sońǵy aqparatqa sáıkes, shahtadaǵy apattan 46 kenshі qaza tapty. Osy qaıǵyly jaǵdaıǵa baılanysty 29 qazan elіmіzde Jalpyulttyq aza tutý kúnі dep jarııalandy.

Shahtadaǵy apattan keıіn Qazaqstan úkіmetі «ArselorMıttal Temіrtaý» kompanııasymen ınvestıtsııalyq yntymaqtastyqty toqtatý týraly sheshіm qabyldady.

Kostenko shahtasyndaǵy apat táýelsіz Qazaqstan tarıhyndaǵy adam shyǵyny eń kóp (46 adam qaza tapty) bolǵan óndіrіstіk apat retіnde tіrkelіp otyr. Buǵan deıіn adam shyǵyny kóp bolǵan eń úlken apat 2006 jyly Lenın shahtasynda boldy, ol kezde 41 kenshі kóz jumdy. 2008 jyly Abaı shahtasynda bolǵan apattan 30 kenshі qaza tapty.