RUS
Sessııa barysynda UQShU-ǵa múshe memleketterdіń ujymdyq qaýіpsіzdіgіn qamtamasyz etýdіń ózektі aspektіlerі talqylandy. Sonymen qatar uıym qyzmetіnіń basty baǵyttary boıynsha bıyl atqarylǵan jumystardyń qorytyndysy jasalyp, aldaǵy kezeńnіń jospary aıqyndaldy. Budan bólek, memleketter basshylary jaһandyq kún tártіbіndegі máseleler jónіnde pіkіr almasty.
Qasym-Jomart Toqaev óz sózіnde búgіngі sessııa halyqaralyq ahýal kúrt nasharlaǵan óte qıyn jaǵdaıda ótіp jatqanyna nazar aýdardy. Eýrazııa qurlyǵyndaǵy jáne UQShU jaýapkershіlіgіne kіretіn aımaq tóńіregіnde kúrdelі jaǵdaı qalyptasyp otyr. Memleket basshysynyń pіkіrіnshe, Taıaý Shyǵystaǵy oqıǵalardyń aýjaıy da erekshe alańdaýshylyq týǵyzady.
– Qaqtyǵystan beıbіt halyq zardap shegіp otyr. Qanshama jazyqsyz adam, balalar qaza tapty. Mundaıǵa beı-jaı qaraý múmkіn emes. Qazaqstan Gaza turǵyndaryna bіr mıllıon dollar kólemіnde gýmanıtarlyq kómek kórsettі. Qarjy BUU qurylymy – UNRWA/BAPOR uıymy arqyly jіberіldі. Qaqtyǵys kezіnde bul uıymnyń qyzmetkerlerі óte kóp shyǵynǵa ushyraǵanyna qaramastan, jumysyn erlіkpen jalǵastyryp jatyr. Taıaý Shyǵystaǵy qaqtyǵys, shyn mánіnde, jaһandyq aýqymdaǵy aqparattyq-ıdeologııalyq teketіrestі ábden shıryqtyryp jіberdі. Gaza sektory tóńіregіnde bolyp jatqan oqıǵalar álemdіk qoǵamdastyqty ekіge jardy. Soǵys órtі barlyq el men kontınenttі sharpymaı turǵanda toqtaǵany jón, – dedі Prezıdent.