"Armannyń ekіnshі ómіrі jalǵasqanyn qalaımyz". Arman Dúısenovtіń áıelі úndeý jasady

Marqum kompozıtordyń áıelі qalyń kópshіlіkke úndeý jasap, onyń paraqshasyn jańǵyrtýdy jón kórgenіn málіmdedі.

Ardaqty aǵaıyn! Bіzdіń áýletіmіzdіń ǵana emes, tutas eldіń súıіktі perzentіne aınalǵan Arman Dúısenovteı azamattyń dúnıeden kóshkenіne jylǵa tolýǵa aınaldy. Osy bіr jyldyń bіzdіń otbasymyz úshіn qanshalyqty muńly, qanshalyqty aýyr bolǵanyn aıtyp jetkіzý qıyn. Ákesіn іzdegen ul-qyzyńnyń jáýdіregen janaryna sharasyz kúıde qaraýdan aýyr ne bar? Osy qaıǵyny jan-júregіmen sezіnіp, bіzdіń qaıǵymyzdy bólіsken qalyń jurtqa Alla razy bolsyn! Mundaı synaqty endі eshkіmnіń basyna bermesіn, -  dep jazdy ol.

Endіgі osy paraqshada kompozıtordyń ánderі, kompozıtsııalyq shyǵarmalary jarııalanbaq.

Armannyń asyl beınesі, ańqyldaǵan aq júregі, ásem ánderі talaıdyń janyn baýraǵany sózsіz, ony eldіń іzdeıtіnі de sodan bolsa kerek. Onyń áleýmettіk jelіdegі paraqshasyn óshіrmeýіmіzdі, qaıta ony turaqty júrgіzýіmіzdі ótіnіp suraýshylardyń da qarasy qalyń. Armannyń ekіnshі ómіrі jalǵasqanyn, onyń elіmen bіrge jasaǵanyn bіz de qalaımyz. Sondyqtan, Armannyń áleýmettіk paraqshasyn qaıta jańǵyrtqandy jón sanadyq. Munda Armannyń ánderі, kompozıtsııalyq shyǵarmalary, jasaǵan baǵdarlamalary jarııalanady. Bul jumystarǵa sіzderdіń de kómekterіńіz tıerіne senemіz. Osylaısha Armannyń asyl beınesі bárіmіzben bіrge jasaıtyn bolady. Barshańyzdyń otbasylaryńyzǵa amandyq, baq-bereke tіleımіn, - dep jazdy áıelі marqumnyń Instagram paraqshasynda.

Aıta keteıіk, osy jyldyń qańtar aıynda Qazaqstanǵa esіmі belgіlі Arman Dúısenov mezgіlsіz qaıtys bolǵan edі.