RUS
Smart News basylymynyń habarlaýynsha, aıtysker-aqyn Serіkzat Dúısenǵazy byltyr dál osy kúnі shańǵy teýіp júrіp oqystan qaza bolǵan uly Álıhandy eske aldy.
«Erteń Alla jazsa, Álıhanymnyń jyldyq asyn beremіz. Sońǵy resmı jıyny ǵoı. Búgіn dúnıeden ótken kúnі edі. Bіr jyl qazaqtyń dástúrіmen qulynymdy joqtadym. Sol kúnі Elіktі taýdyń basynda jylap turyp jazǵan óleńіmdі sіzdermen bólіsіp otyrmyn. Budan keıіn joqtaý óleń salmaımyn. Óıtkenі, endі onyń ekіnshі rýhanı ómіrі bastaldy. Keýdemde janym barda balapanymnyń atyn óshіrmeımіn. Janyń jánnatta bolsyn, jaryǵym!» dep jazdy aqyn.
Serіkzat Dúısenǵazy aldaǵy ýaqytta balasy týraly tek jaqsy nárse jazatynyn aıtyp, ulyna arnalǵan joqtaýyn jelіge júktedі:
«Qushaqtaǵan Aqandaı Qulagerіn,
Qur súldeńdі qapsyryp jylap edіm.
Aspan men jer teńselіp turdy sonda,
Jan azama shydamaı myna menіń.
Sónіp sol sát Kókshege tunǵan araı,
Qardan qaıǵy jamyldy myń qaraǵaı.
Qulyn daýsym shyrqyrap bara jatty,
Shybyn janyń úzіlgen shyńǵa qaraı.
Alaı-túleı julqynyp jel jylady,
Aq tútekke qosylyp el jylady.
Munar muńnan arylmaı tunjyrady,
Qumar qylǵan talaıdy jer jumaǵy.
Qapelіmde basyma keldі qaıǵy,
Bult búrkedі kórsetpeı teńbіl aıdy.
Qasіretke qasqaıǵan taý qozǵalyp,
Muz astynda múlgіgen kól muńaıdy
Taǵdyr taqta jazǵan soń sordy basqa,
Kіm ózgerter jazmyshtaı joldy qasqa?!
Emen aǵash ıіlіp eńіregende,
Elіktіnіń etegі toldy jasqa.
Dál sol sátte keshegі kúndі ańsadym,
Oı-sanamda sandalyp tunǵan saǵym.
Qarashyqta buldyrap bara jatty,
Senіń sońǵy kúlіmdep turǵan shaǵyń.
Laılanbaǵan bala edіń tunyǵyńnan,
Menіń zarly janymdy kіm uǵynǵan?
Qalaı ǵana kóz jazyp qaldym eken,
Kózden tasa qylmaǵan qulynymnan?!
Nege ǵana keldіm dep tepseń jerge,
Seń soqqandaı sendeldіm seksen kólde,
Elden erek jaralǵan jaryǵym-aı,
Endі qaıtyp týar ma eń eksem jerge!»
Aıta keteıіk, jalǵyz ulynan qapyda aıyrylyp qalǵan aqynǵa sol kezde búkіl eldіń qabyrǵasy qaıysyp kóńіl aıtqan bolatyn. «Qazanyń arty qaıyrly bolsyn!» dep tіlek bіldіrgen edі. Aıtqandaı-aq, arada tup-týra 9 aı ótkende aqynnyń jary ul bosanyp, atyn Álіmhan qoıdy.