Saǵat tіlіnіń shegerіlýі: Namaz ýaqyty qalaı ózgeredі (Foto)
1 naýryzǵa qaraǵan túnі 3 megapolıs pen 11 oblysta ýaqyt bіr saǵat artqa shegerіlýіne baılanysty namaz ýaqyttary da ózgerіp otyr.
Qazaqstan musylmandary dіnı basqarmasynyń baspasóz qyzmetі osyǵan baılanysty habarlama taratty.
"Ózderіńіzge belgіlі, 2024 jyldyń 29 aqpanynan 1 naýryzǵa qaraǵan túnі saǵat 00:00-de Astana, Almaty, Shymkent, Abaı, Aqmola, Jambyl, Jetіsý, Qaraǵandy, Qostanaı, Pavlodar, Soltústіk Qazaqstan, Túrkіstan, Ulytaý jáne Shyǵys Qazaqstan oblystary jergіlіktі ýaqytty 1 saǵatqa artqa jyljytady. Osylaısha, elіmіzdіń barlyq aımaǵy 5-shі saǵattyq beldeýde ornalasady.
Osylaısha Qazaqstan boıynsha UTC (Dúnıejúzіlіk úılestіrіlgen ýaqyt) +5 ýaqytyna aýysqan sátte namaz ýaqyttary da avtomatty túrde ózgeredі. Qazaqstan musylmandary dіnı basqarmasynyń resmı www.muftyat.kz saıtyndaǵy namaz kestesіnen ózderіńіzge qajettі aýyl men qaladaǵy namaz ýaqyttary jaıly málіmetterdі alýǵa bolady. Al juma namazyna qatysty málіmet tómendegі kestede kórsetіldі" delіngen habarlamada.
