Бүгін қазақтың бұлбұл әншісі Бибігүл Төлегенованың туған күні

SMARTNEWS.KZ басылымының хабарлауынша, бүгін қазақтың бұлбұл дауысты әншісі, әлемді өнерімен тәнті еткен Бибігүл Ахметқызы Төлегенованың туған күні.

Қазақтың жезтаңдай әншісі 1929 жылы 16 желтоқсанда Шығыс Қазақстан облысы Семей қаласында туған. Аты аңызға айналған қазақстандық опера бұлбұлы, актриса әрі педагог, Социалистік еңбек ері, КСРО халық әртісі, КСРО мемлекеттік сыйлығының лауреаты, сондай-ақ тәуелсіз Қазақстанның бірнеше наградалары мен атақтарына ие болған.

Ол 1958 жылы Бүкілодақтық эстрада әртістері байқауының лауреаты атанған. 1967 жылы КСРО халық әртісі атағын, 1970 жылы КСРО Мемлекеттік сыйлығын, 1991 жылы Социалистік Еңбек Ері атағын иеленді.

Бибігүл Төлегенова Үндістан, Мысыр, Франция, Италия секілді елдердің сахналарында өнер көрсетіп, қазақ өнерінің мәртебесін асқақтатты.

 - Ұлттық өнерді әлемдік деңгейге көтерген аңыз әншінің 95 жылдық мерейтойы құтты болсын! – деп жазды министрліктің баспасөз қызметі.

Еске сала кетейік, былтыр Бибігүл Төлегенова барша қазақстандықтарды Тәуелсіздік күнімен құттықтап, отандастарына үндеу арнаған еді.

"Құрметті достар! Сіздердің баршаларыңызды, мемлекетіміздің Тәуелсіздік күнімен құттықтай отырып, баршаларыңызға зор денсаулық тілеймін, ұзақ өмір тілеймін. Кеше жауған аппақ қардай аппақ көңіл тілеймін. Тыныштық болсын, елімізде амандық болсын. Іштегі дау, сырттағы жаудан сақтасын. Аман-есен болыңыздар. Келесі мерекелерді де аман-есен қарсы алайық. Мереке құтты болсын! Келе жатқан Жаңа жылдарыңыз да құтты болсын!" - деген еді Бибігүл Төлегенова.