RUS
Алғаш бұл оқиға туралы заңгер Анна Чернова әлеуметтік желіде хабарлаған болатын.
"Жаңа ғана мәжіліс депутаты Дәулет Тұрлыхановтың ұлы Нұрасыл Болаттың жазаға тартылған әскери бөлімінен қашып кеткенін білдім", - дейді заңгер.
Сондай-ақ заңгер жазбасында "BMW-мен кетіп қалған. Көрген адамдар болса, оның тергеуде екенін ұмытып кеткенін айтыңыздар" деп жазған.
Көп ұзамай ақпаратты Қорғаныс министрлігі растады. Министрлік жіберген хабарламада былай делінген:
"2023 жылғы 2 шілдеде Қонаев гарнизонының әскери бөлімдерінің бірінде мерзімді қызметін өткеріп жатқан қатардағы жауынгер Б. қамауға алу мерзімі аяқталғаннан кейін (бұйрыққа бағынбау немесе оны өзгедей орындамағаны үшін гауптвахтада ұстау түрінде әкімшілік жауапкершілікке тартылды) әскери қызметшінің сүйемелдеуімен әскери бөлімнің орналасқан жеріне қайтып бара жатқан кезінде белгісіз бағытта қашып кеткен", - деп хабарлайды ведомство өкілдері.
Еске салайық, ақпанда Тұрлыхановтың ұлы адвокат Анна Чернова мен Олег Черновты соққыға жыққан еді. Адвокаттар жас жігіттің құрбысын ұрып-соққанын көріп, қызға араша түспек болды.
Кейіннен бұл жағдайға қатысты мәжіліс депутаты Дәулет Тұрлыханов ұлының төбелеске қатысқанын растап, жағдайға араласпайтынын, ұлының заң алдында толық жауап беретінін айтқан.
Қазірде әскери қызметшінің орналасқан жерін анықтау бойынша іздестіру іс-шаралары ұйымдастырылып жатыр. Аталмыш факті бойынша қызметтік тексеріс тағайындалған.