RUS
Кеше депутаттың ұлы Нұрасыл Болат әскери бөлімнен қашып кеткені туралы алғаш боп заңгер Анна Чернова әлеуметтік желіде хабарлаған болатын. Кейіннен хабардың растығын Қорғаныс министрлігі жеткізді.
Ал Министрліктің бүгінгі хабарлауы мынадай:
"2023 жылғы 3 шілдеде ішкі істер органдарының қызметкерлері және әскери полицияның әскери қызметшілерімен ұйымдастырылған бірлескен жедел-іздестіру іс-шаралары барысында әскери бөлімді өз еркімен тастап кеткен мерзімді қызметтегі қатардағы жауынгер Б. орналасқан жері анықталды. Әскери қызметші қызмет атқаратын орнына жеткізілді", - делінген ведомство хабарламасында.
Сондай-ақ қазір аталған факті бойынша қызметтік тексеріс жүргізіліп жатыр деген ақпарат берілді.
Еске сала кетсек, ақпанда Тұрлыхановтың ұлы адвокат Анна Чернова мен Олег Черновты соққыға жыққан еді. Адвокаттар жас жігіттің құрбысын ұрып-соққанын көріп, қызға араша түспек болды.
Кейіннен бұл жағдайға қатысты мәжіліс депутаты Дәулет Тұрлыханов ұлының төбелеске қатысқанын растап, жағдайға араласпайтынын, ұлының заң алдында толық жауап беретінін айтқан болатын.