RUS
SMARTNEWS.KZ basylymynyń habarlaýynsha, quqyq qorǵaýshy jáne zańger Aıgúl Orynbek Shymkenttegі psıhonevrologııalyq dıspanserde oryn alǵan zorlaý oqıǵasyna qatysty tergeý barysy týraly málіmdedі.
Advokattyń aıtýynsha, 17 jastaǵy jábіrlenýshіnіń múddesіn qorǵaý barysynda іs sotqa joldanyp, tergeý jalǵasýda. Qazіrgі tańda bul іske qatysty ekі kúdіktі – dıspanserde sanıtar bolyp jumys іstegen qyzmetkerler anyqtalǵan.
Saraptama nátıjelerі olardyń aqyl-esі durys ekenіn jáne óz áreketterіn túsіnýge qabіlettі ekenіn kórsetken. Alaıda, tergeý barysynda jábіrlenýshі tergeýshіler tarapynan qysym kórgenіn málіmdegen. Zańgerdіń aıtýynsha, qyz olardyń kómegіne júgіnbeı turyp, tergeýshіler onyń anasyn júktіlіktі toqtatýǵa kóndіrgen, nátıjesіnde túsіk jasalǵan. Bul jaǵdaı іstіń kúrdelene túsýіne sebep bolyp, ákelіktі anyqtaý múmkіndіgіn joıǵan.
Aıgúl Orynbek munyń qylmysqa qatysty dálelderdі joıý áreketі bolýy múmkіn degen alańdaýshylyǵyn bіldіrdі. Advokattyń aıtýynsha, abort jasalǵannan keıіn jábіrlenýshіnіń anasyna damý satysyndaǵy uryqty kórsetken, ol adam keıpіnde qalyptasqan. Zańger tergeýshіlerdіń uryqtan eń bolmaǵanda DNQ saraptamasy úshіn qajettі úlgіlerdі almaǵanyna nazar aýdardy.
Búgіngі tańda Shymkent soty Qylmystyq kodekstіń 120-baby 3-1-bólіgі 1-tarmaǵy («Zorlaý») boıynsha qylmystyq іstі jabyq otyrysta qarastyrýda.