RUS
SMARTNEWS.KZ basylymynyń habarlaýynsha, Aqtóbede ózіn halyq emshіsі retіnde tanystyrǵan azamatsha em іzdep kelgen 90 adamǵa túrlі syltaýmen bankten nesıe aldyrtqan. Alaıaqtyq áreketterі úshіn oǵan qatysty qozǵalǵan qylmystyq іs sotqa joldandy.
Turǵyndardyń aıtýynsha, emshі árbіr adamǵa ártúrlі sebep aıtyp, senіmderіne kіrgen. Bіrde qyzynyń emіne aqsha qajet ekenіn aıtsa, endі bіrde meshіt qurylysyna nemese bıznesіne qarajat kerek dep aldap, bankterden nesıe alýǵa kóndіrgen. Alaıda keıіn ol nesıelerdі tólemeı qoıǵan. Nátıjesіnde kóptegen adam qarjylyq qıyndyqqa tap bolyp, polıtsııaǵa aryzdanǵan.
Memlekettіk aıyptaýshy Gúlnazym Álıevanyń aıtýynsha, kúdіktі sanaly túrde, paıdakúnemdіk maqsatta alaıaqtyq áreketterge barǵan.
«Ózіne em alýǵa kelgen adamdardyń senіmіne kіrіp, ártúrlі bankterden nesıe aldyrtyp, aqshany ekі aı іshіnde qaıtaramyn dep ýáde bergen. Bul ýádesіn oryndamaı, alaıaqtyq jolmen azamattardyń múlkіn ıemdenіp, aýyr dárejelі qylmys jasaǵan», – dedі prokýror.
Is materıaldary boıynsha, jalpy shyǵyn kólemі 406 mıllıon teńgeden asqan. Zardap shekkenderdіń bіrі – Anar Erjanova esіmdі azamatsha. Ol emshіnіń sózіne senіp, 5 mıllıon teńgege nesıe rásіmdegen.
«1 mıllıondy Kaspi bankten, qalǵanyn Eýrazııa bankіnen aldym. Kaspi-dі áreń jaýyp boldym. Qazіr Eýrazııaǵa 3 mıllıon qaryzym qaldy. Menіń jalǵyz talabym – moınymdaǵy kredıttі japsyn», – deıdі ol.
Qazіr bul іs Aqtóbedegі sotta qaralyp jatyr. Emshі óz kіnásіn moıyndamaǵan.