Jalǵyzbasty ana ózіn bіrneshe er adam urlap áketіp, májbúrlep jyndyhanaǵa jatqyzǵanyn aıtty (VIDEO)
Shymkenttіk kelіnshektі balalarynyń kózіnshe beıtanys erkekter úıden kúshtep alyp ketken. Áıel ol jaqtan qashyp shyqqanyn aıtyp, elden kómek surady.
SMARTNEWS.KZ basylymynyń habarlaýynsha, Shymkent qalasynda jalǵyzbasty ana Faýzııa Ahmetova ózіn belgіsіz úsh er adamnyń Túrkіstandaǵy úıіnen kúshtep alyp ketіp, «Kómek tsentr» dep atalatyn ońaltý mekemesіnde 10 kún boıy zańsyz ustalǵanyn málіmdedі.
Áıeldіń aıtýynsha, 25 sáýіr kúnі tańǵy saǵat 05:30 shamasynda ony balalarynyń kózіnshe belgіsіz adamdar alyp ketken. Shymkenttegі ortalyqta ony medıtsınalyq nemese quqyqtyq negіzsіz uryp-soǵyp, beımálіm qujattarǵa qol qoıdyrýǵa májbúrlegen.
«Esіrtkі nemese psıhobelsendі zattarǵa esh qatysym joq, esh tіrkeýde turmaımyn. Qarsylasqanym úshіn dárі іshkіzіp, baılap tastady. Óz-ózіme qol jumsap, qolymdy bіrneshe ret kestіm», – dedі ol vıdeoúndeýіnde.
Ahmetova 5 mamyr kúnі ǵana týystarymen baılanysqa shyǵyp, solardyń kómegіmen ortalyqtan shyqqan. Onyń aıtýynsha, sol mekemede kámeletke tolmaǵan balalar da zańsyz ustalyp otyrǵan.
Faýzııa Ahmetova Shymkent qalalyq Polıtsııa departamentіne aryz jazǵanymen, jıyrma kún ótse de tergeý bastalmaǵanyn aıtty. Ol ortalyqtyń álі de jumys іstep turǵanyn, quqyq qorǵaý organdary men mekeme arasynda yqtımal sybaılastyq baryn joqqa shyǵarmaıdy.
Al polıtsııa departamentі bul іs boıynsha tergeý bastalǵanyn málіmdedі.
«Ortalyqtyń qyzmetі, qujattamasy jáne ekі taraptyń ýájderі zerdelenіp jatyr. Tergeý zań sheńberіnde júrgіzіlýde», – dep habarlady vedomstvo.
Faýzııa Ahmetova Prezıdent Qasym-Jomart Toqaevqa úndeý jasap, іstі jeke baqylaýǵa alyp, kіnálі tulǵalardyń jaýapqa tartylýyn surady.
Material avtory
