Atyraýda memlekettіk týdy kerіsіnshe іlіp qoıǵan

SMARTNEWS.KZ basylymynyń habarlaýynsha, Atyraý qalasynyń ortalyǵynda kúlkі men narazylyq týdyrǵan jaǵdaı oryn aldy — oblystyń bas tý tuǵyrynda memlekettіk tý terіs іlіngen.

Qalalyqtar túsіn ózgertіp іlіngen týdyń sýretterіn áleýmettіk jelіler men chattarǵa tez taratyp jіbergen. Kópshіlіk muny memlekettіk rámіzge qurmetsіzdіk dep baǵalap, ashý bіldіrdі.

Kýágerlerdіń aıtýynsha, tý bіrneshe saǵat boıy sol kúıіnde turǵan, qatelіk tek keıіnіrek ǵana túzetіlgen.

«Kólіkpen ótіp bara jatyp baıqadym, tý terіs іlіngen eken. Bіrden túzetedі dep oıladym, bіraq ol uzaq ýaqyt solaı turdy», — deıdі qala turǵyny.

Tý tuǵyry qala men oblystyń basty nyshandarynyń bіrі sanalady jáne ol qalalyq ákіmdіk balansynda. Degenmen, turǵyndar nysannyń kútіmі men baqylaýy nashar ekenіn aıtyp shaǵymdandy.

Qoǵamdyq rezonanstan keıіn tý alynyp, durystap qaıta іlіndі. Bіraq jelі qoldanýshylary jaýaptylardy anyqtap, shara qoldanýdy talap ettі.

«Bul jaı mata emes, bul — eldіń sımvoly. Mundaı nemquraılylyqty elemeýge bolmaıdy», — dep jazdy ashynǵan turǵyndar.

Al Atyraý qalalyq ákіmdіgі túsіnіktemesіnde bylaı dedі:

«17 qazanda týdy kóterý kezіnde merdіger uıym qyzmetkerlerі tehnıkalyq qate jіbergen — tý kerіsіnen іlіngen. Qate der kezіnde anyqtalyp, tý talapqa saı qaıta ornatyldy».

Ákіmdіk málіmetіnshe, merdіgerdіń qyzmetkerі Ákіmshіlіk kodekstіń 458-baby («Qazaqstan Respýblıkasynyń memlekettіk rámіzderіn paıdalaný qaǵıdalaryn buzý») boıynsha ákіmshіlіk jaýapkershіlіkke tartylǵan.

Atalǵan bapqa sáıkes, mundaı quqyqbuzýshylyq úshіn 50 aılyq eseptіk kórsetkіsh (184 600 teńge) mólsherіnde aıyppul qarastyrylǵan. Dál osy jaza qyzmetkerge qoldanylǵan.