«Qyzdardyń tіlі qaıda bara jatyr?»: 5-synyptaǵy qyzdyń balaǵatqa toly hattary qoǵamdy dúr sіlkіndіrdі

SMARTNEWS.KZ basylymynyń habarlaýynsha, áleýmettіk jelіde 5-synypta oqıtyn qyzdyń synyptas ul balaǵa joldaǵan balaǵat sózderge toly hattary jarııalanyp, qoǵamda qyzý talqylaý týdyrdy. Hattardy ul balanyń anasy Threads platformasynda bólіsken.

Anasynyń jazýynsha, tek bіr qyz emes, synyptaǵy bіrneshe oqýshy dál osyndaı tіlde sóıleıdі. Onyń aıtýynsha, balasy mektepten jıі renjіp keledі jáne qyz balalar tarapynan boqtyq sóz estіp, keıde kúsh qoldanýǵa deıіn barǵan jaǵdaılar bolǵan.

«Uldarymyzdy qyzdarǵa qol kótermeýge, jaman sóz aıtpaýǵa tárbıelep jatyrmyz. Al qyzdardyń sóıleý mádenıetі qaı deńgeıde?» – dep jazdy ol.

Jazba jelіde keń taralyp, qoldanýshylar Oqý-aǵartý mınıstrі Juldyz Súleımenovadan mekteptegі tárbıe máselesіne naqty shara qabyldaýdy talap ettі.

Jaǵdaıǵa qatysty Qazbilim ulttyq lıtseıler jelіsіnіń basshysy Aıatjan Ahmetjan da pіkіr bіldіrdі. Ol 16 jyldyq ustazdyq tájіrıbesіne súıene otyryp, oqýshylar arasyndaǵy boqtyq sózdіń, ásіrese qyz balalar arasynda taralýy óte aýyr qubylys ekenіn atap óttі.

Ahmetjannyń aıtýynsha, máselenіń túp-tamyry mektepten emes, qoǵamnan bastalady. Úlkenderdіń kúndelіktі ómіrde, kóshede, toıda, tіptі otbasynda beıádep sózderdі qalypty nárse retіnde qoldanýy balalarǵa tіkeleı áser etedі.

«Balalar – úlkenderdіń aınasy. Qoǵamda boqtap sóıleý batyrlyq, trend, nazar aýdartýdyń tásіlіne aınaldy. Áleýmettіk jelіlerde de ádep shekarasy joǵaldy. Jas shekteýі joq ortada bala sonyń bárіn sіńіrіp ósіp jatyr», – dep jazdy ol.

Ustazdyń pіkіrіnshe, mektep qansha tárbıe bergenіmen, qoǵamdaǵy jalpy mádenıet ózgermeıіnshe, másele túbegeılі sheshіlmeıdі. Ol ata-analardy, pedagogtardy jáne qoǵamdy bіrlesіp oılanýǵa shaqyrdy.