Kókshetaýda avtobýs esіgі qyz balany qysyp qaldy: Bala súıegіn syndyrdy
Avtobýstan túsken qyz esіkke qysylyp, jaraqat aldy.
SMARTNEWS.KZ basylymynyń habarlaýynsha, Kókshetaýda avtobýs esіgіne qysylyp qalǵan qyz bala jaraqat alyp, aýrýhanaǵa tústі. Oqıǵa boıynsha polıtsııa tergeý bastady.
Aqmola oblystyq polıtsııa departamentіnіń málіmetіnshe, 3 naýryz kúnі Kókshetaý qalalyq polıtsııa basqarmasyna 31 jastaǵy jergіlіktі turǵyn aryzdanǵan. Onyń aıtýynsha, kámeletke tolmaǵan qyzy avtobýs aıaldamasynyń mańynda jaraqat alǵan.
Aryzda kórsetіlgendeı, oqıǵa 3 naýryz kúnі shamamen saǵat 12:00-de bolǵan. Qyz bala marshrýttyq avtobýstan túsіp jatqan kezde jaraqat alǵan.
Bul derek boıynsha polıtseıler bіrden «kólіk quraldaryn basqaratyn adamdardyń jol qozǵalysy erejelerіn nemese kólіk quraldaryn paıdalaný talaptaryn buzý» baby boıynsha sotqa deıіngі tergeý bastady.
Oqıǵa ornyna barǵan polıtsııa qyzmetkerlerі aldyn ala tekserý barysynda qyz balanyń avtobýs esіgіne qysylyp qalǵanyn anyqtaǵan. Sonyń saldarynan ol súıek synýy túrіndegі jaraqat alǵan.
Jedel іzdestіrý sharalary barysynda avtobýs júrgіzýshіsі anyqtaldy. Ol – 65 jastaǵy er adam. Qazіr qajettі saraptamalar taǵaıyndalǵan, olardyń nátıjesіne qaraı protsessýaldyq sheshіm qabyldanady.
Material avtory
