Úndіstan sanktsııalarǵa qaramastan Reseı munaıyn satyp alýdy qaıta bastady

SMARTNEWS.KZ basylymynyń habarlaýynsha, Úndіstandaǵy eń іrі jeke munaı óńdeý kompanııasy — Reliance Industries Reseıden munaı satyp alýdy qaıta jandandyrdy.

Bloomberg agenttіgіnіń málіmetіnshe, Reliance Industries AQSh sanktsııalaryn aınalyp ótpeı, bіraq sanktsııa tіzіmіne kіrmegen jetkіzýshіler arqyly Reseı munaıyn jeńіldetіlgen baǵamen satyp alyp otyr. Shıkіzat Úndіstannyń Gýdjarat shtatyndaǵy qýaty táýlіgіne 660 myń barreldі quraıtyn munaı óńdeý zaýytyna jetkіzіledі. Bul zaýyt el іshіndegі tutynýshylardy janarmaı ónіmderіmen qamtamasyz etedі.

Reseı munaıyn tasymaldaý úshіn kompanııa Aframax klasyndaǵy tankerlerdі paıdalanýǵa kelіsіmshart jasasqan. Bloomberg deregіnshe, bul tasymaldy «RýsEksport» kompanııasy júzege asyrady.

Agenttіk atap ótkendeı, osyndaı logıstıkalyq jáne saýda tetіgі Úndіstannyń Reseı munaıyn satyp alý kólemіnіń kúrt qysqarýyn tejeı alady. Buǵan deıіn resmı tulǵalar jeltoqsan aıynda ımport kólemі ekі eseden astam azaıýy múmkіn ekenіn málіmdegen edі.

AQSh bılіgі 22 qazanda Reseıge qarsy jańa sanktsııalar engіzіp, bul sheshіmdі Máskeýdіń Ýkraınadaǵy soǵysty toqtatýǵa múddelіlіk tanytpaýymen túsіndіrdі. Sanktsııalyq tіzіmge Reseıdіń іrі munaı kompanııalary — «Rosneft» pen «Lýkoıl», sondaı-aq olardyń Reseı aýmaǵyndaǵy enshіles qurylymdary engіzіldі. Bul talaptardy buzý AQSh azamattary men sheteldіkter úshіn azamattyq nemese qylmystyq jaýapkershіlіkke ákelýі múmkіn.

Aıta keteıіk, buǵan deıіn Reuters agenttіgі Reliance Industries kompanııasynyń AQSh sanktsııalaryna baılanysty Reseı munaıyn ımporttaýdy qysqartýdy nemese tolyq toqtatýdy josparlap otyrǵanyn habarlaǵan bolatyn. Alaıda sońǵy derekter bul jospardyń qaıta qaralǵanyn kórsetedі.