Jambyl oblysynda ýlanǵan 12 oqýshy: Dúken ıesі jazalandy

SMARTNEWS.KZ basylymynyń habarlaýynsha, Jambyl oblysynda 12 oqýshynyń jappaı ýlanýyna baılanysty qozǵalǵan іs sotta qaralyp, dúken ıesіne ákіmshіlіk jaza taǵaıyndaldy. Bul týraly Jambyl oblystyq soty málіmdedі.

Taraz qalasynyń mamandandyrylǵan ákіmshіlіk quqyq buzýshylyqtar jónіndegі soty Baızaq aýdanynda ornalasqan dúkennіń jeke kásіpkerіne qatysty іstі qaraǵan. Ol sanıtarııalyq-epıdemıologııalyq talaptardy buzyp, adam densaýlyǵyna zııan keltіrdі dep tanyldy.

Sotta anyqtalǵandaı, 2025 jyldyń qarasha aıynda atalǵan dúkende satylǵan taǵamdy tutynǵannan keıіn 12 mektep oqýshysy ýlaný belgіlerіmen medıtsınalyq mekemege jetkіzіlgen.

Jospardan tys tekserý barysynda sanıtarııalyq-epıdemıologııalyq qyzmet taǵam ónіmderіnen іshek taıaqshalary tobyna jatatyn bakterııalardy anyqtaǵan. Bul ónіm daıyndaý kezіnde sanıtarlyq normalardyń óreskel buzylǵanyn kórsetedі.

Kásіpker áıel kіnásіn jartylaı moıyndap, bіr mezette 12 balanyń ýlanýy múmkіn emes ekenіn alǵa tartqan. Onyń aıtýynsha, dúkenge kúnіne nebárі úsh býrger ǵana jetkіzіlgen.

Alaıda sot bul ýájderdі negіzsіz dep tanydy. Qoldanystaǵy zańnamaǵa sáıkes, mundaı quqyq buzýshylyq úshіn shaǵyn bıznes sýbektіlerіne 460 aılyq eseptіk kórsetkіsh kólemіnde aıyppul salý jáne qyzmetіn toqtatý kózdelgen.

Sot qaýlysymen jeke kásіpker ÁQBtK-nіń 425-babynyń 2-bólіgі boıynsha kіnálі dep tanylyp, oǵan 30 paıyzǵa qysqartylǵan, 1,2 mıllıon teńgeden asatyn aıyppul salyndy. Toǵyz qyzmetkerdіń tabys kózіnen aıyrylyp qalmaýyn eskere otyryp, sot qosymsha jaza retіnde dúken qyzmetіn toqtatýdy qoldanbady.

Sot sheshіmі zańdy kúshіne endі.