Talǵardyń burynǵy ákіmі qazіr taksıst bop júrgenіn aıtty

SMARTNEWS.KZ basylymynyń habarlaýynsha, Talǵar qalasynyń burynǵy ákіmі Arystanbek Ábіlqaıyruly qyzmetten ketkennen keıіn taksı júrgіzýshіsі bolyp jumys іstep júrgenіn aıtty. Ol qazіr jalǵa alǵan kólіkpen jolaýshy tasyp, tabys taýyp júr.

Eks-ákіm bul týraly bergen suhbatynda qandaı eńbek bolsa da arlanbaıtynyn jetkіzdі. Onyń aıtýynsha, úıde bos otyrýdy namys kórgen.

«Qazaqta “esektі jýsań da, aqsha tap” degen sóz bar. Úıde jatyp alý maǵan uıat boldy. Otbasymdy asyraýym kerek. Ózіmnіń kólіgіm joq, sondyqtan jalǵa alǵan mashınamen taksı júrgіzіp júrmіn. Kúndіz de, túnde de jumys іsteımіn. Keıde tún ortasyna deıіn rólde otyramyn. Kún saıynǵy josparym – 18 500 teńge tabys tabý», – dedі ol.

Jýrnalıst eks-ákіmnen qyzmetten ketýіne qysym boldy ma dep suraǵan. Alaıda Ábіlqaıyruly bul sheshіmdі densaýlyǵyna baılanysty óz erkіmen qabyldaǵanyn aıtty. Onyń sózіnshe, atasynyń qaıtys bolýy psıhologııalyq jáne fızıkalyq jaǵdaıyna áser etken. Keıіn júrekke baılanysty máseleler týyndap, joǵary júktemenі kóterý qıynǵa soqqan.

Sondaı-aq burynǵy ákіm qyzmetіn tolyq deńgeıde atqara almaǵanyn moıyndady. Soǵan qaramastan, bar kúshіn salǵanyn atap óttі. Eger taǵy múmkіndіk berіlse, memlekettіk qyzmetke qaıta oralýǵa daıyn ekenіn de jasyrmady.

Eske salaıyq, Arystanbek Ábіlqaıyruly Talǵar qalasynyń ákіmі kezіnde TikTok jelіsіnde belsendі bolyp, qaladaǵy máselelerdі beınejazbalar arqyly kórsetіp, qoǵam nazaryn aýdarǵan edі. Keıіn qyzmettіk mіndetterіn durys oryndamaǵany úshіn oǵan aıyppul salynǵan. Osydan keıіn ol óz erkіmen qyzmetten ketkenіn málіmdegen.