«Ózіmdі Reseıdegі ózbekteı sezіndіm»: Almatyǵa kelgen reseılіk qyz daýǵa qaldy

SMARTNEWS.KZ basylymynyń habarlaýynsha, Qazaqstanda reseılіk qyzdyń vıdeosy qyzý talqyǵa tústі. Almatyǵa kelgen azamatsha JSN men bank kartasyn rásіmdeý kezіndegі bıýrokratııaǵa shaǵymdanyp, áleýmettіk jelіde daýly málіmdeme jasady.

Threads jelіsіnde jarııalanǵan vıdeoda ol bіrneshe kún boıy HQKO men bank arasynda sabylǵanyn aıtyp, Qazaqstandaǵy qyzmet kórsetý júıesіn synǵa alǵan. Onyń sózіnshe, jeke sáıkestendіrý nómіrіnsіz bank shotyn da, kartany da jyldam ashý múmkіn bolmaǵan.

Alaıda jelіdegі basty reaktsııany bıýrokratııa emes, qyzdyń aıtqan sózі týdyrdy. Vıdeoda ol balaǵat sózder qoldanyp, «Reseıdegі ózbekteı sezіnіp turmyn» dep málіmdegen.

Bul tіrkes kópshіlіktіń ashýyn týǵyzdy. Qazaqstandyq qoldanýshylar muny eńbek mıgranttaryna jáne ózge ult ókіlderіne qatysty mensіnbeýshіlіk retіnde qabyldady. Pіkіr jazǵandar shetel azamattaryna JSN rásіmdeý — qalypty zańdy talap ekenіn, onsyz elde bank jáne memlekettіk qyzmetterdіń kóbі kórsetіlmeıtіnіn eske saldy.

Keıbіr jelі qoldanýshylary qyzdyń ashýǵa boı aldyrǵanyn túsіnýge bolatynyn aıtqanymen, basym kópshіlіk onyń sóıleý mánerіn orynsyz dep baǵalady. Kommentarıılerde «bank qyzmetіn Reseıden alsyn», «mundaı sózderge quqyqtyq baǵa berіlýі kerek» degen pіkіrler de jazylǵan.

Sonymen qatar bіrqatar qazaqstandyq bul jaǵdaı mıgranttarǵa qatysty qalyptasqan stereotıpter máselesіn de ashyp berdі dep esepteıdі. Olardyń aıtýynsha, vıdeodaǵy sózder Reseıdegі eńbek mıgranttaryna jıі kórsetіletіn mensіnbeýshіlіk kózqarastyń kórіnіsіn baıqatady.