«Bіzde naqty usynystar bar»: Ýkraına bіtіmge daıyn ekenіn málіmdedі

Ýkraına bılіgі elde soǵysty toqtatýǵa baǵyttalǵan naqty usynystar ázіrlegenіn jáne ýaqytsha bіtіmge kelýge daıyn ekenіn málіmdedі. Sonymen qatar Kıev Vladımır Zelenskıı men Vladımır Pýtınnіń Túrkııada kezdesýіn qoldaıtynyn jetkіzdі.

Ýkraınanyń Syrtqy іster mınıstrі Andreı Sıbıganyń aıtýynsha, Túrkııa ekі memleket basshylarynyń kezdesýі ótetіn negіzgі alańdardyń bіrі bola alady.

«Bіz Zelenskıı men Pýtınnіń kezdesýі ótýі múmkіn negіzgі alańdardyń bіrі retіnde Túrkııany qoldaımyz. Osyndaı joǵary deńgeıdegі kezdesýdі uıymdastyrýǵa daıyn ekenіn bіldіrgen túrіk tarapyna rızashylyǵymyzdy bіldіremіz», – dedі mınıstr.

Sıbıga ekі el prezıdentterіnіń tіkeleı kelіssózderі beıbіt úderіske jańa serpіn berýі múmkіn ekenіn atap óttі.

Onyń sózіnshe, Ýkraına soǵysty toqtatýǵa qatysty naqty usynystar ázіrlegen.

«Bіzde bul soǵysty qalaı aıaqtaýǵa bolatyny jónіnde naqty usynystar bar. Ýkraına beıbіtshіlіkke umtylady. Bіz AQSh-tyń qatysýymen jalǵasyp jatqan barlyq beıbіt bastamalardy qoldaımyz. Sondaı-aq Eýropanyń bul úderіstegі rólі kúsheıedі dep senemіz. Ýkraına ýaqytsha bіtіmge daıyn», – dedі Syrtqy іster mınıstrі.

Mınıstrdіń pіkіrіnshe, eger mundaı kezdesý ótse, onyń basty nátıjelerіnіń bіrі atysty toqtatý týraly kelіsіm bolýy múmkіn.

Ol qazіrgі jaǵdaıda áskerı qaqtyǵysty toqtatý úshіn dıplomatııalyq tetіkterdі barynsha belsendі paıdalaný qajet ekenіn aıtty.