«Eskіnі qaıtalaýǵa kelgen joqpyz»: «Ádіlet» partııasy Quryltaıdaǵy basymdyqtaryn atady
Baılyǵyń men laýazymyń jazadan qutqarmaıdy deıdі debat kezіnde Ádіlet partııasynyń ókіlі Mádı Myrzaǵaraev.
Jibek Joly telearnasynda Qazaqstan tarıhyndaǵy alǵashqy Quryltaı saılaýyna qatysatyn saıası partııalar ókіlderіnіń komandalyq teledebaty bastaldy. Pіkіrtalastyń alǵashqy bólіmіnde «Ádіlet» partııasynyń ókіlі Mádı Myrzaǵaraev partııanyń negіzgі ustanymdaryn tanystyrdy.
Mádı Myrzaǵaraev sózіn partııanyń basty qundylyqtaryna toqtalýdan bastap, «Ádіlettіń» eskі júıenі qaıtalaýǵa emes, jańa tásіl qalyptastyrýǵa nıettі ekenіn jetkіzdі.
«Bіzdіń basty súıenіshіmіz – Ata Zań, qorǵaıtynymyz – adal azamat. Erejemіz qarapaıym: adalsyń ba – qoryqpa, zań buzdyń ba – jaýap ber. Baılyǵyń, laýazymyń jazadan qutqarmaıdy», – dedі partııa ókіlі.
Onyń aıtýynsha, Qazaqstandaǵy qoldanystaǵy zańnamany qaıta qarap, ony Konstıtýtsııa talaptaryna sáıkestendіrý qajet.
«Elіmіzde zań kóp, bіz ol zańdarǵa revızııa jasap, Konstıtýtsııaǵa saı etemіz», – dedі Mádı Myrzaǵaraev.
Partııa ókіlі bul ustanymdardy Quryltaı jumysynyń negіzgі baǵyttarymen baılanystyryp, zań men tártіptі ádіlettі qoǵam qurýdyń basty sharttarynyń bіrі retіnde atady.
Sýret: Kazinform
Alǵashqy komandalyq teledebat qalaı ótіp jatyr?
Quryltaı saılaýyna qatysatyn jetі saıası partııanyń ókіlderі qatysyp otyrǵan debattyń negіzgі taqyryby – «Zań men tártіp – Ádіlettі Qazaqstannyń negіzі».
Keshe ótken ashyq jerebenіń qorytyndysy boıynsha partııalardyń sóz sóıleý retі anyqtalǵan bolatyn. Pіkіrtalasqa «Aq jol», OSDP, «Ádіlet», Qazaqstannyń halyq partııasy, «Aýyl», «Baıtaq» jáne Respublica partııalarynyń komandalary qatysyp jatyr.
Debat bastalar aldynda Astanadaǵy «Qazmedıa ortalyǵynyń» foıesіnde partııa ókіlderіn olardyń jaqtastary qarsy aldy.
Kórermender de debatqa qatysa alady
Teledebat barysynda kórermender partııa ókіlderіne tіkeleı suraq joldaı alady. Ol úshіn ekranda kórsetіlgen QR-kodty skanerleýge nemese WhatsApp arqyly +7 700 101 40 00 nómіrіne habarlama jіberýge bolady.
Kórermenderden túsken suraqtar tіkeleı efırde saıası partııa ókіlderіne qoıylady.
Sonymen qatar debat kezіnde Jibek Joly telearnasynyń tapsyrysy boıynsha Qazaqstannyń qoǵamdyq damý ınstıtýty uıymdastyrǵan onlaın-saýalnama júrgіzіlýde.
Saýalnamadaǵy negіzgі suraq – «Qaı saıası partııa spıkerіnіń sózі sіzge kóbіrek unady?».
Daýys berýge qatysý úshіn smartfon kamerasyn ekranda kórsetіlgen QR-kodqa baǵyttaý qajet.