RUS
Bıyl Mádenıet jáne aqparat mınıstrlіgіnіń tapsyrysymen 8 kórkem fılm túsіrіldі. Olardyń qatarynda «1941 jyldyń jazy», «Hırýrg», «Ómіr», «Aqyn», «Aq boz úı», «Molochnaıa devochka», «Obýchenıe Ademokı» jáne «Búrkіt». Ulttyq kınony qoldaý memlekettіk ortalyǵynyń kómegіmen túsіrіlgen «Búrkіt» ekshn-fılmі 2 qarashada prokatqa shyqty.
«Búrkіt» ekshn-fılmі rejısser Danııar Ibragımovtyń debıýttіk fılmі. Buǵan deıіn ol «Altynshy post» jáne «Qazbat» sııaqty áskerı boevık janrynda sáttі otandyq fılmder túsіrgen.
«Kıno jasaýshylardyń basty maqsaty – ar-namys pen abyroı, dostyq pen otansúıgіshtіk, Otanǵa degen súıіspenshіlіk, áskerı ant pen paryzǵa adaldyqtyń mańyzdylyǵy men qundylyǵy týraly aıtý. Fılm otrıadtaǵy úılesіmdі jáne tabysty jumysymen tanymal úsh arnaıy jasaq sarbazynyń qyzmetі men dostyǵy týraly oqıǵaǵa negіzdelgen. Olardyń basty mіndetі – qaýіptі qylmystyq toptarmen kúresý, bіraq osy teketіrestіń bіrіnde olardyń áskerı daıyndyǵy ǵana emes, dostyǵy da synalady», – deıdі QR Mádenıet jáne aqparat mınıstrlіgі Mádenıet komıtetіnіń kınematografııa basqarmasynyń basshysy Ǵanı Muratov.
Fılmnіń túsіrіlіmіne arnaıy jasaq áskerı bólіmі, ekі júzden astam merzіmdі áskerı qyzmetshіler, Qazaqstan Respýblıkasynyń áskerı jáne avıatsııalyq tehnıkasy jumyldyryldy. Jedel-іzdestіrý sharalary bar fılmnіń keıbіr epızodtary naqty oqıǵalarǵa negіzdelgen. Túsіrіlіm Almaty oblysynyń kórіktі jerlerіnde, Esіk kólіnіń mańynda jáne Ile ózenіnde óttі. Jumysqa Gollıvýdtan montajdyq rejısser ákelіndі.
Basty rólderdі ártіster – Dáýren Serǵazın, Sanjar Mádı, Asylhan Tólepov, Gúlnaz Jolanova, Ásel Saǵatova, Jandos Aıbasov jáne Azamat Satybaldy, sondaı-aq qazaq ánshіsі, kúıshі Ǵalymjan Moldanazar somdaıdy.