RUS
Bul týraly Smartnews.kz saıty habarlap otyr.
Úkіmettіń baspasóz qyzmetіnіń habarlaýynsha, Densaýlyq saqtaý mınıstrі Aqmaral Álnazarova ulttyq joba 655 jańa alǵashqy medıtsınalyq-sanıtarııalyq kómek nysanyn (medıtsınalyq pýnktіler, feldsherlіk-akýsherlіk pýnkt, dárіgerlіk ambýlatorııalar) salýdy, 32 kópbeıіndі ortalyq aýdandyq aýrýhanalardy jańǵyrtýdy, sondaı-aq aýyldaǵy densaýlyq saqtaý nysandary úshіn 1 100 medıtsına qyzmetkerіn daıarlaýdy kózdeıtіnіn atap óttі.
Búgіngі tańda 92 medıtsınalyq-sanıtarııalyq alǵashqy kómek obektіsіnіń qurylysy aıaqtalǵan, 7 medıtsınalyq mekeme boıynsha jumystar jalǵasýda, jyl sońyna deıіn taǵy 556 nysandy paıdalanýǵa berý josparlanyp otyr. Ulttyq jobanyń qalǵan baǵyttary boıynsha qajettі rásіmder men protsester júrіp jatyr.
Premer-Mınıstrdіń aıtýynsha, qazіrgі ýaqytta jobalardyń saraptamasyn keshіktіrý oryn alýda. Budan basqa Ulytaý jáne Qostanaı oblystarynda obektіlerdі salý merzіmderі aýysýda.
Atalǵan máseleler boıynsha ónerkásіp jáne qurylys mınıstrі Qanat Sharlapaev, sondaı-aq óńіrler ákіmderі Berіk Ábdіǵalıuly men Qumar Aqsaqalov túsіnіkteme berdі.
Oljas Bektenov «Aýylda densaýlyq saqtaýdy jańǵyrtý» ulttyq jobasyn júzege asyrý máselesі Úkіmette bіrneshe ret qaralǵanyn, bіraq ázіrge naqty nátıje joq ekenіne toqtaldy.
«Ótken jyly 309 obektіnі salý josparlanǵan bolatyn. Densaýlyq saqtaý mınıstrlіgі baqylaýdy álsіretіp aldy. Ákіmdіkter de qurylys oryndaryn anyqtaý, jer ýchaskelerіn ýaqytyly bólý boıynsha túrlі syltaý aıtyp, máselenі shuǵyl sheshýge nıet tanytqan joq. Jobalaý qujattaryn rásіmdeý men saraptama máselelerі de tym kesheýіldep kettі. Sondyqtan aýyldyq jerlerdegі medıtsına obektіlerіnіń qurylysyn bastaý merzіmderі buzyldy», — dedі Premer-Mınıstr.
Úkіmet basshysynyń aıtýynsha, byltyr ákіmdіkter tıptіk jobalardy jergіlіktі jerge baılanystyrýǵa tıіs edі, bul jumys ta aıaqsyz qaldy. Jalpy bıyl 239 obektіnіń jobalyq qujattamasy daıyn, onyń 109-y boıynsha ǵana merdіger kompanııalar aıqyndaldy. Qalǵandary ázіrge naqty іsten górі, jalań sóz kúıіnde qalyp otyr.
«Qurylys jumystaryn aldaǵy naýryz-sáýіr aılarynda bastaý qajet. Densaýlyq saqtaý mınıstrlіgі bolsa, olardy qarjylandyrý úshіn bıýdjettіk ótіnіmderdі berýge asyǵar emes. Ákіmdіkter de qarjylandyrý máselelerіn sheshe almaı keledі. Álі kúnge deıіn kópbeıіndі ortalyq aýdandyq aýrýhanalardy kúrdelі jóndeý jumystary bastalǵan joq. Sondaı-aq olarǵa medıtsınalyq jabdyqtar satyp alý іsіnde de jaǵdaı máz emes. Mundaı protsedýralar kóp ýaqytty alady», — dedі Úkіmet basshysy.
Oǵan qosa Oljas Bektenov ulttyq joba úshіn jıһaz jáne qurylys materıaldaryn jetkіzýge otandyq óndіrýshіlerdі tartý qajettіgіne nazar aýdardy. Atap aıtqanda, «Samuryq-Qazyna» qory men onyń enshіles uıymdary otandyq taýarlar men qyzmetterdі keńіnen satyp alyp, ózіmіzdіń qazaqstandyq taýar óndіrýshіlerge qoldaý kórsetýge tıіs.
«Ótken aptada ǵana jeńіl ónerkásіp qaýymdastyǵynyń basshysy Ábdіkárіmova Saltanat “Samuryq-Qazyna” qorynyń taýar satyp alý saıasatyn synǵa alyp, konkýrstarda shıkіlіktіń baryn aıtyp, shaǵymdandy. Men kásіpkerlerdіń pіkіrіn qoldaımyn. Bіz osy saladaǵy jaǵdaıdy túbegeılі ózgertіp, otandyq óndіrýshіlerdі qoldaý júıesіn qurýǵa tıіspіz», — dedі Premer-Mınıstr.
Sonymen qatar Úkіmet basshysy Ulttyq joba boıynsha jaǵdaıdy jaqsartý úshіn jumys qarqynyn barynsha kúsheıtý qajettіgіn aıtty. Atap aıtqanda, árbіr obektіnіń qurylysyn qujattardy daıyndaý, qarjylandyrý kezeńіnen bastap, ýaqytyly tapsyrǵanǵa deıіn kúndelіktі baqylaýǵa alý qajet. Sondaı-aq medıtsınalyq jabdyqtarmen jáne personalmen qamtamasyz etý máselesі de nazardan tys qalmaýǵa tıіs.
Úkіmet basshysy oblys ákіmdіkterіne Ónerkásіp jáne qurylys mınıstrlіgіmen bіrge 1 sáýіrge deıіn jobalarǵa vedomstvodan tys keshendі saraptama júrgіzýdі aıaqtaýdy tapsyrdy.
«Densaýlyq saqtaý, Qarjy mınıstrlіkterі men ákіmdіkter jobalardy qarjylandyrý máselesіn jedel sheshýge tıіs», — dep túıіndedі Oljas Bektenov.