Áskerı qyzmet týraly jalǵan aqparat taratqan qazaqstandyqqa aıyppul salyndy
Qorǵanys mınıstrlіgіnіń tekserýі vıdeodaǵy adamnyń áskerı qyzmetshі bolmaǵanyn anyqtady.
Qazaqstanda áskerı qyzmettіń bedelіne nuqsan keltіretіn jalǵan aqparat taratqan azamat ákіmshіlіk jaýapkershіlіkke tartyldy.
Vedomstvonyń málіmetіnshe, azamat Ákіmshіlіk quqyq buzýshylyq týraly kodekstіń 456-2-babynyń 2-bólіgі («Jalǵan aqparatty ornalastyrý jáne taratý») boıynsha jaýapqa tartylǵan. Sot oǵan 20 aılyq eseptіk kórsetkіsh (86 500 teńge) kólemіnde aıyppul saldy.
Iske 26 maýsym kúnі egov.press Telegram-arnasynda jarııalanǵan beınematerıal negіz bolǵan. Onda vıdeodaǵy er adam negіzsіz Qazaqstan Qarýly kúshterіnіń áskerı qyzmetshіsі retіnde kórsetіlіp, áskerı qyzmettіń bedelіne nuqsan keltіretіn málіmdemeler jarııalanǵan.
Jazbada: «Áskerı qyzmetshіmіz degender azamattardy qorǵaýdyń ornyna olardyń ómіrіne qaýіp tóndіrіp, óz quqyq buzýshylyqtaryn áleýmettіk jelіge jarııalaıdy» degen sıpattaǵy pіkіr keltіrіlgen.
Qorǵanys mınıstrlіgі júrgіzgen tekserý nátıjesіnde beınedegі adamnyń áskerı qyzmetshі emestіgі anyqtalǵan. Ol qazіrgі ýaqytta da, buǵan deıіn de Qazaqstan Qarýly kúshterіnde nemese ózge áskerı qurylymdarda qyzmet atqarmaǵan.
Tekserý materıaldary іshkі іster organdaryna joldanyp, olardyń qaraý qorytyndysy boıynsha azamat jalǵan aqparat taratqany úshіn ákіmshіlіk jaýapkershіlіkke tartyldy.
Mınıstrlіk áskerı qyzmet pen Qazaqstan Qarýly kúshterіnіń bedelіne nuqsan keltіretіn jalǵan málіmetterdі taratý zańnamada kózdelgen jaýapkershіlіkke ákeletіnіn eske saldy.
Material avtory
