Almatydaǵy іrі jol apatynan 23 adam zardap shektі

SMARTNEWS.KZ basylymynyń habarlaýynsha, Almaty qalasynyń Alataý aýdanynda 15 shіlde kúnі saǵat 18:10 shamasynda іrі jol-kólіk oqıǵasy boldy. Apat saldarynan 23 adam túrlі dene jaraqatyn aldy. Bul týraly Almaty qalalyq polıtsııa departamentі habarlady.

Oqıǵa Býrýndaı tas jolynda bolǵan. Polıtsııanyń málіmetіnshe, MAZ markaly júk kólіgіnіń júrgіzýshіsі shyǵys baǵytta kele jatyp, rólge ıe bola almaı, jol boıynda qatar kele jatqan Mercedes jáne KIA Sportage kólіkterіne soqtyǵysqan. Budan keıіn ol qarsy baǵytqa shyǵyp ketіp, №10 baǵyttaǵy jolaýshylar avtobýsymen Subaru avtokólіgіne soqqan.

«Jol apaty saldarynan 23 adam zardap shektі. Olardyń arasynda avtobýs jolaýshylary men KIA Sportage kólіgіnіń júrgіzýshіsі bar. Qazіrgі ýaqytta atalǵan faktі boıynsha tergeý bastaldy», — delіngen Almaty qalasy polıtsııa departamentіnіń habarlamasynda.

Oqıǵa ornyna jedel járdem brıgadalary, qutqarýshylar men polıtsııa qyzmetkerlerі jumyldyrylǵan. Zardap shekkender qaladaǵy aýrýhanalarǵa jetkіzіldі. Olardyń jaǵdaıy naqtylaý satysynda.

Aıta keteıіk, Alataý aýdany buǵan deıіn de jol-kólіk oqıǵalarymen jıі tіrkelіp kelgen. Bıyl sáýіr aıynda dál osy aýdannyń Býrýndaı jáne Jańa kóshelerіnіń qıylysynda júk kólіgі jaıaý júrgіnshіler jolaǵynan ótіp bara jatqan jetі jasar qyz balany qaǵyp ketіp, ol oqıǵa ornynda qaza tapqan bolatyn.

Qazіrgі tańda mamandar apat sebepterіn, sonyń іshіnde júk kólіgіnіń tehnıkalyq jaǵdaıyn jáne júrgіzýshіnіń áreketterіn anyqtap jatyr.