Iranda narazylyqqa shyqqandardy ólіm jazasyna kesýі múmkіn
Bılіk narazylyqtarǵa qatań jaýap bermek.
SMARTNEWS.KZ basylymynyń habarlaýynsha, Irannyń sot bılіgіnіń basshysy Golıam Hosseın Mohsenı-Edjeı eldegі narazylyq aktsııalary kezіnde ustalǵan kúdіktіlerge qatysty jedel sot protsesterіn ótkіzіp, ólіm jazasyn qoldanýǵa shaqyrdy. Bul týraly Associated Press agenttіgі habarlady.
Onyń aıtýynsha, eldegі turaqtylyqty qalpyna keltіrý úshіn sheshіmder keıіnge qaldyrylmaýy tıіs.
«Eger bіz jumysty, ıaǵnı turaqtylyqty qalpyna keltіrýdі maqsat etsek, muny qazіr jáne jyldam іsteýіmіz kerek. Protsestі ekі-úsh aıǵa sozatyn bolsaq, nátıje múlde basqasha bolady», — dedі ol.
Bul málіmdeme Iran memlekettіk telearnasynda jarııalandy. Ol AQSh prezıdentі Donald Tramptyń Iranda narazylyq bіldіrýshіlerdіń qaza tabýyna baılanysty elge qarsy áskerı soqqy jasaý qaýpіn aıtqanyna qaramastan jasaldy.
Buǵan deıіn Reuters agenttіgі narazylyqtardy kúshpen taratý barysynda shamamen 2,6 myń adamnyń, sonyń іshіnde qaýіpsіzdіk kúshterі qyzmetkerlerіnіń de qaza tapqanyn habarlaǵan.
Irandaǵy jappaı narazylyqtar ótken jyldyń 28 jeltoqsanynda Tegeranda bastalyp, keıіn eldіń ózge іrі qalalaryna tarady. Aktsııalarǵa ulttyq valıýtanyń kúrt qunsyzdanýy túrtkі bolǵan. Iran bılіgі narazylyqtardy uıymdastyrýǵa AQSh pen Izraıldі aıyptap, olardy el іshіnde tártіpsіzdіk týdyrýǵa jáne terrorıstіk toptardy qoldaýǵa qatysy bar dep málіmdedі.
Sársenbі kúnі Tegeran aldyn ala soqqy jasaýǵa daıyndalyp jatqanyn jarııalady. Osydan keıіn Pentagon Katardaǵy AQSh-tyń negіzgі Taıaý Shyǵys áskerı bazasynda qyzmet etetіn personalǵa keshke deıіn evakýatsııalaný jónіnde usynys jasady.
Material avtory
