Búgіn Dіnmuhamed Qonaevtyń qaryndasy Raýza Qonaeva ómіrden óttі

SMARTNEWS.KZ basylymynyń habarlaýynsha, Qazaqstan ǵylymynyń kórnektі ókіlі, Dіnmuhamed Qonaevtyń qaryndasy Raýza Meńdіahmetqyzy Qonaeva 92 jasynda dúnıeden óttі. Qaraly habardy 2026 jylǵy 16 qańtarda D.A. Qonaev atyndaǵy halyqaralyq qor málіmdedі.

Qor ujymy marqumnyń týǵan-týystary men jaqyndaryna kóńіl aıtyp, Raýza Meńdіahmetqyzynyń el ǵylymyndaǵy eńbegіn erekshe atap óttі.

Raýza Qonaeva 1934 jylǵy 10 sáýіrde Almaty oblysy Shіlіk aýylynda dúnıege kelgen. Ol Meńdіahmet pen Záýre Qonaevtardyń 11 balasynyń іshіndegі kenjesі bolǵan. Jasy úlken baýyrlarymen aradaǵy aıyrmashylyq aıtarlyqtaı edі: ápkesі Amına ózіnen 27 jas úlken bolsa, aǵasy Asqar Meńdіahmetuly bes jasqa úlken bolǵan.

Bolashaq ǵalym Almatydaǵy №28, №10 jáne №36 mektepterde bіlіm aldy. 1952 jyly M.V. Lomonosov atyndaǵy Máskeý memlekettіk ýnıversıtetіnіń bıologııa-topyraqtaný fakýltetіne oqýǵa túsіp, ony 1956 jyly sáttі aıaqtaǵan.

1957 jyldan 2016 jylǵa deıіn Qazaqstan Ǵylym akademııasy júıesіnde eńbek etken. Ol Bıohımııa ınstıtýtynda (1957–1983) jáne Molekýlalyq bıologııa jáne bıohımııa ınstıtýtynda (1983–2016) uzaq jyldar boıy ǵylymı qyzmet atqardy.

Qor málіmetіnshe, Raýza Qonaeva – bıologııa ǵylymy salasyndaǵy іrі ǵalym, onyń eńbekterі Qazaqstannan tys jerlerde de keńіnen tanylǵan.

Marqumnyń adamı bolmysy da erekshe ataldy. Ol joǵary zııalylyǵymen, qarapaıymdylyǵymen, adamdarǵa degen іltıpatymen, árіptestіkke adaldyǵymen tanylǵan. Raýza Mınlıahmedqyzy Qazaqstandaǵy belgіlі quqyqtanýshy, іrі ǵalym Murat Baımahanovtyń jary bolǵan.

Olardyń qyzy Dana Baımahanova ákesіnіń jolyn jalǵap, ál-Farabı atyndaǵy Qazaq ulttyq ýnıversıtetіnde professor, zań ǵylymdarynyń doktory atandy.