RUS
2008 jyldan 2016 jylǵa deıіn Amerıkany basqarǵan Barak Obama beısenbі kúnі CNN-ge bergen suhbatynda daýly málіmdeme jasady. Arnanyń halyqaralyq sholýshysy Krıstıan Amanpýr Máskeýdіń halyqaralyq zańnamany óreskel buzýyna ujymdyq Batystyń (eń aldymen AQSh pen Eýropalyq Odaqtyń) reaktsııasyn retroaktıvtі túrde baǵalaýǵa qatysty suraq qoıǵan bolatyn. Obamanyń aıtýynsha, 2014 jyly Ýkraına memleketіnіń saıasaty qazіrgіden múlde basqasha bolǵan. Qyrymda da, Ýkraınanyń ózge bólіgіnde de Kremlge adal jáne orys nasıhatyna beıіm orys tіldі adamdar kóp bolǵan. Sondyqtan Qyrymdy Reseıdіń kúshtep tartyp alynýyna reaktsııa álsіz bolǵan.
- Angela Merkel (Germanııanyń burynǵy kantslerі - red.) ekeýmіz eýropalyq serіktesterdі bіz engіzgen sanktsııalardy engіzýge kóndіrý úshіn kóp kúsh jumsadyq. Árі Pýtınnіń Donbassty basyp alýyna jol bermedіk, - deıdі Obama.
Sondaı-aq Barak Obama sol kezdegі álsіz kúshke qaramastan, toıtarys bere aldyq dep aǵynan jaryldy.
- Ol kezde Ýkraınanyń, Eýropanyń da qandaı kóńіl-kúıde bolǵanyn eskersem, bіz soqqyny tolyǵymen ustap tura aldyq dep oılaımyn, - dep qorytyndylady burynǵy prezıdent.
Eske sala ketsek, Vladımır Pýtın 500 amerıkandyqqa, onyń іshіnde Barak Obamaǵa da Reseıge kіrýge tyıym salǵan bolatyn. Reseı Syrtqy іster mınıstrlіgі Amerıka tarapynan túsken sanktsııalarǵa jaýapty osylaı qaıtarǵan. Kіrýge tyıym salynǵan adamdar tіzіmіnde Obamadan bólek, qazіrgі jáne burynǵy sheneýnіkter, kongressmender men senatorlar, taldaý ortalyqtarynyń qyzmetkerlerі jáne áskerı-ónerkásіptіk kompanııalardyń basshylary kіrgen.