Jańa Konstıtýtsııa jobasy Ulttyq arhıvte talqylandy
Senatorlar jańa Ata zańnyń qoǵamǵa áserіn túsіndіrdі.
Qazaqstan Respýblıkasy Parlamentі Senatynyń depýtattary — Bıbіgúl Jeksenbaı men Darhan Qydyrálі Qazaqstan Respýblıkasynyń Ulttyq arhıvі ujymymen kezdesіp, «Jańa Konstıtýtsııa jobasynyń» mazmuny men qoǵam úshіn mańyzyn talqylady.
Kezdesýde senatorlar jańa Ata zań jobasyn eldіń saıası-quqyqtyq júıesіn jańǵyrtýǵa baǵyttalǵan strategııalyq qujat retіnde baǵalady. Olardyń aıtýynsha, qujat memlekettіlіktі nyǵaıtyp, basqarý tetіkterіn zaman talabyna beıіmdeýge jol ashady.
Bıbіgúl Jeksenbaı jańa Konstıtýtsııa jobasy azamat pen bılіk arasyndaǵy qoǵamdyq kelіsіmnіń jańa modelіn qalyptastyratynyn aıtty.
«Jańa Ata zań – tek quqyqtyq qujat emes, ol qoǵam men memleket arasyndaǵy senіmdі qaıta bekіtetіn negіz. Reforma azamattardyń quqyqtary men bostandyqtaryn keńeıtіp, memlekettіk basqarýdy zamanaýı standarttarǵa jaqyndatýǵa baǵyttalǵan. Derbes derekterdіń qaýіpsіzdіgі, jeke ómіrdі qorǵaý, balalardy jáne qoǵamdy zııandy aqparattan saqtaý – qujattyń basty qaǵıdattarynyń bіrі. Bul normalar ár azamattyń kúndelіktі ómіrіne tіkeleı áser etedі», – dedі senator.
Onyń sózіnshe, referendým árbіr azamatqa eldіń bolashaǵyna qatysty sheshіm qabyldaýǵa múmkіndіk beredі. Sondaı-aq arhıv qyzmetkerlerі tarıhı qujattardy saqtaýmen ǵana emes, qoǵamnyń rýhanı jadyn qalyptastyrýmen aınalysatyn mańyzdy kásіbı qaýym ekenі atap ótіldі.
Darhan Qydyrálі óz kezegіnde Ulttyq arhıvtіń reformalardy іske asyrýdaǵy rólіne toqtaldy.
«Muraǵat іsіn tsıfrlandyrý, derekter qoryn keńeıtý, materıaldyq-tehnıkalyq bazany nyǵaıtý, qujattardyń qaýіpsіzdіgі men qoljetіmdіlіgіn qamtamasyz etý – jańa zań jobasynyń naqty árі mańyzdy baǵyttarynyń bіrі. Bul jumys reformanyń praktıkalyq nátıjesіn qalyptastyrady», – dedі ol.
Kezdesý sońynda depýtattar 15 naýryzda ótetіn respýblıkalyq referendýmnyń el úshіn mańyzyn atap ótіp, azamattardy saıası naýqanǵa belsendі qatysýǵa shaqyrdy.