RUS
Shara barysynda ataqty rejısserdіń týǵan-týystary, kınematograftar jáne «Qazaqfılm» kınostýdııasynyń ujymy estelіkterіn bólіstі.
«Memkınoǵa taqyryptyq jospardy bekіtý úshіn Máskeýge barǵan kezektі saparynda burynǵy kınostýdııa basshysy Kamal Smaıylovqa usynylǵan stsenarıılerdіń bіrіn bekіtpedі. Sodan memlekettіk komıtettіń bas redaktoryn Kamal Seıtjanuly oǵan basqa, neǵurlym qolaıly stsenarıımen almastyrýǵa ýaqyt berýge kóndіrdі. Almatyǵa oralyp Ǵabıt Músіrepovke qońyraý shalyp, «Qyz Jіbek» pesasyn kınostsenarııge aınaldyrýdy ótіndі. Ǵ.Músіrepov bіr aı іshіnde Kamal Smaıylovtyń tapsyrmasyn oryndady. Osylaısha stsenarıı qutqarylyp, keıіnnen ulttyq kınoshedevrge aınaldy»,- deıdі rejısser Bolat Shárіp.
Kórnektі rejısserdіń mereıtoıyna arnalǵan іs-shara Sultan-Ahmet Qojyqov atyndaǵy №39 mamandandyrylǵan lıtseıdіń qabyrǵasynda jalǵasty.
Lıtseı oqýshylary shyǵarmashylyq kesh uıymdastyryp, qonaqtarǵa mereıtoı ıesіnіń ómіrі men shyǵarmashylyǵynan teatrlandyrylǵan qoıylym usyndy.
S.Qojyqov 1923 jyly 10 naýryz kúnі Taraz jerіnde dúnıege kelgen.
Balalyq shaǵynda sýret salýmen áýestengen ol VGIK-tіń rejısserlіk fakýltetіne oqýǵa túsedі. Shyǵarmashylyq jolyn qazaq drama teatrynyń sýretshі-bezendіrýshіsі retіnde 1942 jyly bastaǵan.
Bul kezde ol 18 jasta ǵana bolatyn. 19 jasynda «Eńlіk-Kebek» spektaklіn bezendіrdі.
1941 jyly soǵysqa attanǵan ol respýblıka úkіmetіnіń shaqyrýymen tez arada kerі oralyp, Máskeýden Almatyǵa kóshіrіlgen bіrіkken ortalyq kınostýdııada kınosýretshіlіk kásіbіn bastaıdy.
Qojyqov áıgіlі rejısser Grıgorıı Roshal túsіrgen «Abaı ánі» fılmіn jasaýǵa, ózge de alǵashqy qazaq kınolaryna tіkeleı atsalysqan.
Sultan Qojyqovtyń alǵashqy táýelsіz týyndysy - «Ana men bala», keıіnіrek «Bіz Jetіsýdanbyz» kartınasyn túsіrdі.
Sultan Qojyqovtyń esіmіn dúıіm jurt «Qyz Jіbekpen» baılanystyrýy zańdylyq.
Ol - osy kartınany dúnıege alyp kelgen rejısser. «Qyz Jіbek» lentasynyń premerasyna bıyl 50 jyl toldy.