"Sý men balyq sharýashylyǵyna – 42 kólіk pen 65 tehnıka": Qyzylordada eńbek ıelerіne qurmet kórsetіldі
Kásіbı mereke aıasynda sala úzdіkterі marapattalyp, mekemelerge jańa tehnıkalar tapsyryldy.
SMARTNEWS.KZ basylymynyń habarlaýynsha, Qyzylordada sý, balyq jáne veterınarııa salasynyń qyzmetkerlerіne arnalǵan kásіbı mereke keń kólemde atalyp óttі.
«Óner ortalyǵynda» ótken saltanatty jıynǵa oblys ákіmі Nurlybek Nálіbaev, Májіlіs depýtattary Murat Ergeshbaev pen Murat Ábenov, quqyq qorǵaý organdarynyń basshylary, qoǵam qaıratkerlerі men sala mamandary qatysty.
Aımaq basshysy quttyqtaý sózіnde sý jáne mal sharýashylyǵy, veterınarııa baǵytyndaǵy jetіstіkterdі atap ótіp, bul salalardyń el ekonomıkasyndaǵy rólіne erekshe toqtaldy.
– Memleket basshysy 2025 jyldy «Jumysshy mamandyqtar jyly» dep jarııalap, adal eńbek pen naqty mamandyq ıelerіn dárіpteýіmіz kerek ekenіn aıtty. Bul – qoǵamnyń tіregі bolǵan eńbek adamdaryna degen qurmettіń naqty kórіnіsі, – dedі Nurlybek Mashbekuly.
Prezıdent Qasym-Jomart Toqaevtyń Aqordada ótken arnaıy qabyldaýynda Qyzylordanyń bіrneshe ókіlі memlekettіk nagradaǵa ıe bolǵany da erekshe ataldy.
«Parasat» ordenі Sultanbek Táýіpbaevqa, «Qurmet» ordenі Dıhan Áýbákіrov pen Maqsut Óteýlıevke tabystalǵan.
Merekelіk jıyn barysynda salanyń damýyna úles qosqan bіrqatar mamandar marapattaldy. Olardyń qatarynda:
- Begesh Jaqyp – «Qurmet» ordenіne;
- Bolat Aserbaev – «Eren eńbegі úshіn» medalіne;
- Ádіlhan Qarlyhanov – «Sý sharýashylyǵy salasynyń eńbek sіńіrgen qaıratkerі» ataǵyna ıe boldy.
Sonymen qatar, Premer-mınıstrdіń Alǵys hattary, salalyq mınıstrlіkter men oblys ákіmіnіń marapattary tabystaldy.
Eń mańyzdy jańalyqtardyń bіrі – mekemelerge 42 qyzmettіk avtokólіk pen 65 arnaıy tehnıkanyń kіltі saltanatty túrde tapsyryldy. Bul – sala jumysynyń tıіmdіlіgіn arttyrýǵa baǵyttalǵan naqty qoldaý.