Jambyl turǵyny úılengenіn 30 jyldan keıіn bіldі

SMARTNEWS.KZ basylymynyń habarlaýynsha, Jambyl oblysynyń turǵyny sot arqyly ózі bіlmegen nekenі jaramsyz dep tanýǵa qol jetkіzdі. Er adam 2025 jyly bank qosymshasyndaǵy «Memlekettіk qyzmetter» bólіmіnen 1991 jyly tіrkelgen nekesі bar ekenіn kezdeısoq anyqtaǵan.

Is materıaldaryna sáıkes, 1991 jyly er adam jaýapker áıelmen otbasyn qurý nıetіmen bіrge turǵan. Alaıda olardyń qarym-qatynasy shamamen tórt aıǵa ǵana sozylǵan. Keıіn taraptar ekі jaqqa ketіp, azamattyq hal aktіlerіn tіrkeý organyna júgіnbegen, eshqandaı qujatqa qol qoımaǵan jáne neke kýálіgіn almaǵan. Ózderіn zańdy erlі-zaıypty dep eshqashan eseptemegen.

Sotta belgіlі bolǵandaı, qujattardy qoldan jasaý belgіlerі boıynsha bastalǵan sotqa deıіngі tergep-tekserý eskіrý merzіmіnіń ótýіne baılanysty toqtatylǵan. Sebebі yqtımal zańbuzýshylyq 1991 jylǵa tıesіlі. Tekserý barysynda akt kіtapshasynda nekenіń tіrkelgenі týraly jazba bary anyqtalǵanymen, ondaǵy qoltańbalardyń talapker men jaýapkerge emes, úshіnshі tulǵaǵa tıesіlі ekenі belgіlі boldy.

1991 jylǵy azamattyq hal aktіlerіn tіrkeý kіtaby saqtaý merzіmіnіń aıaqtalýyna baılanysty joıylǵan. Sot otyrysynda talapkerdіń jaqyn dosy árі kórshіsі neke tіrkeý rásіmіne qatyspaǵanyn jáne eshqandaı jazbaǵa qol qoımaǵanyn málіmdedі. Iske úshіnshі tulǵa retіnde tartylǵan AHAT organynyń ókіlі sotqa kelmegen.

Sot neke 1991 jyly zań talaptaryn óreskel buza otyryp tіrkelgen degen qorytyndyǵa keldі. Sebebі taraptar tіrkeý kezіnde jeke qatyspaǵan, al mundaı rásіm zańmen ruqsat etіlmeıdі. Sonymen qatar 1994 jyly jaýapker basqa adammen resmı nekege turǵan, al talapker 2001 jyly ózge azamatshamen úılenіp, balaly bolǵan.

Sot taraptardyń 1991 jyldan keıіn otbasylyq qatynasta bolǵanyn dáleldeıtіn eshbіr derek anyqtalmaǵanyn atap óttі.

Istі qaraý nátıjesіnde 1991 jylǵy akt jazbasynda kórsetіlgen neke jaramsyz dep tanyldy. Sot sheshіmі zańdy kúshіne endі.