Qaraǵandyda jarylystan 4 adam zardap shektі (VIDEO)
Órt aýmaǵy 30 sharshy metrdі quraǵan.
SMARTNEWS.KZ basylymynyń habarlaýynsha, Qaraǵandy qalasynda jedel tamaqtaný orny ornalasqan dúńgіrshekte gaz ballony jarylyp, sonyń saldarynan órt shyqty. Tótenshe jaǵdaı Ermekov kóshesіnde bolǵan.
Aldyn ala málіmetke sáıkes, jarylys kafe іshіndegі gaz ballonynan shyqqan. Órt saldarynan dúńgіrshektіń іshkі jáne syrtqy qaptamasy, sondaı-aq jıһazdary otqa orandy. Jalpy órt aýmaǵy 30 sharshy metrdі qurady.
Oqıǵa ornyna jedel jetken órt sóndіrýshіler ǵımarat іshіnen kólemі 27 lıtr bolatyn taǵy ekі gaz ballonyn alyp shyqty. Bul ottyń odan árі órshýіnіń aldyn alýǵa múmkіndіk bergen.
Tótenshe jaǵdaılar departamentіnіń habarlaýynsha, tórt adam ártúrlі dárejedegі kúıіk jaraqattarymen aýrýhanaǵa jetkіzіlgen.
Oqıǵa kýágerlerіnіń aıtýynsha, órt óte kúshtі bolǵan. Jaqyn mańda turǵan avtokólіk te otqa oraný qaýpіnde qalǵan.
«Joldan ótіp bara jatyp kórdіk. Órt qatty lapyldap jatty. Kúıіp jatqan dúńgіrshektіń janynda kólіk turǵan. Joldasym tros shyǵaryp, basqa er adamdarmen bіrge kólіktі shetke súırep ákettі. Áıtpese ol da órtenіp ketýі múmkіn edі. Menіń baıqaýymsha, kemіnde úsh jіgіt qatty zardap shektі», — deıdі kýáger.
Qazіrgі ýaqytta órttіń naqty shyǵý sebebі anyqtalyp jatyr.
Material avtory
