BQO-da aýyl ákіmіne qatysty aýdıohabarlamalar janjalǵa ulasty

SMARTNEWS.KZ basylymynyń habarlaýynsha, Batys Qazaqstan oblysynda Báıterek aýdanyna qarasty Rýbejın aýyldyq okrýgіnіń ákіmі Arman Jumaǵalıevtіń jazysqan aýdıohabarlamalary qoǵam talqysyna tústі. Sheneýnіkke qatysty tártіptіk іs Ádep jónіndegі keńeste qaraldy.

Is materıaldaryna sáıkes, aýyl turǵyny ákіmnіń ózіmen daýystyq habarlamalar arqyly sóılesý barysynda memlekettіk qyzmetshіnіń ádep normalaryn buzǵanyn aıtyp shaǵym túsіrgen. Óz sózіn dáleldeý úshіn ol áńgіme jazbalaryn usynǵan.

Keńeste Arman Jumaǵalıev bul shaǵymnyń alǵash ret túsіp otyrǵanyn aıtyp, ózіne taǵylǵan aıyppen kelіspeıtіnіn málіmdedі.

Onyń aıtýynsha, jazysý jeke sıpatta bolǵan árі jumys ýaqytynan tys júrgіzіlgen. Sondaı-aq ol azamatshanyń ózіne bіrneshe ret habarlasqanyn, al ózі alǵash bolyp baılanysqa shyqpaǵanyn jetkіzdі.

«Men onyń ar-namysy men qadіr-qasıetіne nuqsan keltіretіndeı sóz aıtqan joqpyn. Tek «eshteńe іstemedіń» degen tіrkes qoldandym. Bul jeke hat almasý kezіnde, jumystan tys ýaqytta jazylǵan. Ol menen quzyretіme kіrmeıtіn máselelerdі talap ettі, tіptі sybaılas jemqorlyqqa qatysy bar dep aıyptady. Men eshqashan jemqor bolǵan emespіn», – dedі ákіm.

Sonymen bіrge ol shaǵymdanýshy taraptyń ádeıі tek ózі dórekі sóılegen jazbalardy ǵana usynyp, arandatý bolǵan tustardy kórsetpegenіn alǵa tartty.

Alaıda Ádep jónіndegі keńes múshelerі sheneýnіktіń sózderіnen memlekettіk qyzmetshіnіń ádep qaǵıdalaryn buzý belgіlerі bar degen qorytyndyǵa keldі. Keńes Arman Jumaǵalıevke tártіptіk jaza retіnde «sógіs» berýdі usyndy.

Óz kezegіnde aýyl ákіmі qabyldanǵan sheshіmmen kelіspeıtіnіn jáne ony sot tártіbіmen daýlaýǵa nıettі ekenіn málіmdedі.

«Bul – jumysqa qatysy joq, jeke sıpattaǵy hat almasý. Kerіsіnshe, aýdıojazbany taratý arqyly azamatsha menіń quqyǵymdy buzdy», – dedі ol.

Arman Jumaǵalıev Rýbejın aýyldyq okrýgіnіń ákіmі qyzmetіne 2024 jyly taǵaıyndalǵan. Buǵan deıіn іshkі іster organdarynda qyzmet atqaryp, podpolkovnık shenіne deıіn kóterіlgen.