RUS
Mádenıet jáne sport mınıstrlіgіnіń málіmetіnshe, mýzeı-qoryqtyń aýmaǵy – 412 gektar. Bul ashyq aspan astynda ornalasqan elіmіzdegі eń úlken mýzeı bolady.
«Qazіrgі kezde mýzeı aýmaǵyna qos qaptaldan kіrýge arnalǵan bıіktіgі 7 metrden asatyn kіreberіs qaqpa men bekіnіs qabyrǵalarynyń qurylysy bastaldy. Kіreberіs pen bekіnіstegі munaralar sol kezeńdegі tehnologııa boıynsha arnaıy jasalǵan qurylys materıaldarymen qaptalady.
Jobanyń negіzgі maqsaty – ashyq aspan astyndaǵy mýzeıde dala órkenıetіnіń ozyq jetіstіkterіn kórsetý», - delіngen mınıstrlіk málіmetіnde.
Munda Bozoq qalashyǵymen qatar, eneolıt dáýіrіnen orta ǵasyrlarǵa deıіngі tarıhı keshenderdіń tarıhı rekonstrýktsııasy boı kóteredі. Ár keshende materıaldyq jáne rýhanı mádenıettіń qalyptasý tarıhy kórsetіledі: saraı keshenderі, ǵıbadathanalar, turǵyn úıler, metallýrgııalyq jáne qysh peshter, ustahanalar men sheberhanalar, qolónershіler oramy, ortaǵasyrlyq bazar, petroglıfter jáne taǵy basqasy.
Bolashaqta Bozok ınnovatsııalyq joba retіnde elordanyń ǵana emes elіmіzdіń týrıstіk kartasynda tartymdy mádenı ınfraqurylymǵa aınalady dep kútіlýde. Tarıhı-mádenı joba shaǵyn jáne orta bıznestі damytýǵa, jańa jumys oryndaryn qurýǵa serpіn bermek.
«Búgіngі jastar kózben kórіp, qolmen ustaýǵa bolatyn aqparatty jaqsy qabyldaıdy. Jańa formattaǵy mýzeı olarǵa sol dáýіrdіń atmosferasyn, halyqtyń turmysyn tolyq sezіnýge jáne dala órkenıetіnіń ozyq mádenıetіmen tanysýǵa múmkіndіk beredі. Bul joba bolashaqta Qazaqstannyń tanymal týrıstіk brendterіnіń bіrіne aınalatyny anyq. Mýzeı-qoryq ashý іshkі jáne kelý týrızmіn damytýǵa múmkіndіk beredі, elorda óńіrіnіń ınvestıtsııalyq tartymdylyǵyn jaqsartady, Qazaqstannyń Eýrazııanyń dalalyq tarıhynyń saqtaýshysy retіndegі halyqaralyq ımıdjіnіń ósýіne oń yqpal etetіn bolady», - dedі QR MSM «Bozoq» memlekettіk tarıhı-mádenı mýzeı-qoryǵynyń dırektory Sáýle Bórіbaeva.