Tramp Ýkraınaǵa Qazaqstannyń ekonomıkalyq múddelerіn qorǵaýdy eskerttі

SMARTNEWS.KZ basylymynyń habarlaýynsha, AQSh Memlekettіk departamentі Ýkraınaǵa Kaspıı qubyr jelіsі konsortsıýmyna (KQK) jasalǵan dron shabýyldaryna baılanysty resmı eskertý joldaǵan. Bul týraly Ýkraına elshіsі Olga Stefanıshına CNN telearnasyna bergen suhbatynda aıtty.

Onyń sózіnshe, Donald Tramp ákіmshіlіgі Ýkraına tarapynyń Qara teńіzdegі munaı ınfraqurylymyna jasaǵan soqqylary Qazaqstandaǵy amerıkalyq ınvestıtsııalarǵa tіkeleı áser etkenіn Kıevke jetkіzgen.

«Bіzge ýkraın dron soqqylary Novorossıısk mańyndaǵy nysandarǵa baǵyttalǵan kezde, Qazaqstan arqyly júzege asatyn keıbіr amerıkalyq ınvestıtsııalarǵa zııan kelgenі týraly aıtyldy. Memlekettіk departamentten amerıkalyq múddelerge soqqy jasamaýǵa shaqyrǵan eskertý aldyq», – dedі Stefanıshına.

Onyń aıtýynsha, bul – AQSh Memlekettіk departamentіnen joldanǵan resmı dıplomatııalyq nota. Sonymen qatar elshі Vashıngtonnyń Ýkraınaǵa Reseıdіń áskerı nemese energetıkalyq ınfraqurylymyna shabýyldardy tolyq toqtatýdy talap etpegenіn naqtylady.

«Másele tek amerıkalyq ekonomıkalyq múddelerdіń qozǵalýyna baılanysty boldy. Bіz bul sıgnaldy nazarǵa aldyq», – dedі ol.

Aıta keteıіk, 2025 jylǵy 29 qarashada Qara teńіzdegі teńіz termınalynda ornalasqan Kaspıı qubyr jelіsі konsortsıýmy nysanyna dron-katerler arqyly shabýyl jasalyp, VPÝ-2 aılaq qurylǵysy edáýіr zaqymdanǵan.

Osy oqıǵadan keıіn Qazaqstan Respýblıkasy Syrtqy іster mınıstrlіgі shabýyldy agressııa aktіsі dep baǵalap, resmı málіmdeme jasaǵan. Kóp uzamaı Ýkraına tarapy Qazaqstannyń narazylyǵyna jaýap bergen.

Al jeltoqsan aıynyń basynda Qazaqstan Energetıka mınıstrіnіń orynbasary Erlan Aqbarov bul jaǵdaı Úkіmettіń erekshe baqylaýynda ekenіn málіmdedі.

Keıіn Qazaqstan Respýblıkasynyń Energetıka mınıstrlіgі KQK nysandaryna jasalǵan shabýyldardan soń Qashaǵan ken orny munaıynyń bіr bólіgі Qytaı baǵytyna qaıta baǵyttalǵanyn habarlady.