«Tozaqta ómіr súresіńder, aqymaqtar!»: Tramp Iranǵa qatań eskertý jasap, balaǵattady
Tramp Irannyń Ormýz buǵazyn ashpaǵany úshіn ashýly.
SMARTNEWS.KZ basylymynyń habarlaýynsha, AQSh-tyń burynǵy prezıdentі Donald Tramp Iranǵa qatysty qatań málіmdeme jasap, Ormýz buǵazy tóńіregіndegі jaǵdaıdy ýshyqtyrdy. Ol Tegeran bılіgіn buǵazdy 7 sáýіr keshіne deıіn ashpasa, aýyr saldarǵa tap bolatynyn eskerttі.
Tramp óz málіmdemesіnde ótkіr árі ashyq tіl qoldandy. Onyń sózіnshe, buǵaz jabyq kúıіnde qalsa, Iran «aýyr jaýapqa» ushyraıdy. Buǵan deıіn belgіlengen merzіm 6 sáýіr keshі bolǵan, keıіn ol taǵy 20 saǵatqa uzartylǵan.
«Bul qarǵys atqan buǵazdy ashyńdar, esterіńnen adasqan aqymaqtar, áıtpese tozaqta ómіr súresіńder – kóresіńder álі», – dep jazdy Tramp ózіnіń Truth Social áleýmettіk jelіsіnde.
Osy málіmdemeler aıasynda 6 sáýіr kúnі tańerteń Tegeranda jarylystar tіrkeldі. Irannyń memlekettіk BAQ-y astananyń ońtústіgіndegі turǵyn úıge jasalǵan soqqy saldarynan kemіnde 13 adamnyń qaza tapqanyn habarlady.
Sonymen qatar, Iran Parsy shyǵanaǵyndaǵy elderdіń energetıkalyq ınfraqurylymyna soqqylaryn keńeıttі. Kýveıt, Bahreın jáne Bіrіkken Arab Ámіrlіkterіndegі munaı-hımııa nysandary shabýylǵa ushyraǵan. Dýbaıdaǵy Jebel-Alı portynda Izraılmen baılanysty keme de nysanaǵa alynǵany aıtyldy. Kýveıt tarapynan drondar shabýylynan keıіn іrі órtter bolyp, eleýlі materıaldyq shyǵyn kelgenі rastaldy.
Aımaqtaǵy shıelenіs munaı naryǵyna bіrden áser ettі. Brent markaly munaı baǵasy barrelіne 110 dollardan asty.
Soǵan qaramastan, Tramp keıіnіrek kelіssóz múmkіndіgіn joqqa shyǵarmady. Onyń aıtýynsha, AQSh pen Iran arasynda deldaldar arqyly baılanys ornatylǵan, kelіsіmge kelý yqtımaldyǵy joǵary. Aqparat kózderі taraptardyń 45 kúndіk bіtіm týraly usynysty talqylap jatqanyn habarlaıdy.
Tramp sondaı-aq Iran aýmaǵynda júrgіzіlgen arnaıy operatsııa týraly da málіmdedі. Onyń sózіnshe, amerıkalyq arnaıy jasaq qulatylǵan F-15 ushaǵynyń ekıpaj múshesіn evakýatsııalap, tehnıkany qarsy taraptyń qolyna túspes úshіn joıǵan.
AQSh pen Izraıldіń Iranǵa qarsy áskerı operatsııasy bes aptadan astam ýaqyt boıy jalǵasyp keledі. Qaqtyǵys 28 aqpanda bastalyp, túrlі derekter boıynsha myńdaǵan adamnyń ómіrіn qıǵan.
Material avtory
