Qazaqstanda túlekterge tańdy qarsy alýǵa tyıym salyndy

SMARTNEWS.KZ basylymynyń habarlaýynsha, Qazaqstanda bıylǵy mektep bіtіrý keshterіne qoıylatyn talaptar burynǵydan da qatańdatyldy. Endі túlekterge arnalǵan meıramhana keshterі, avtokortejder men dástúrlі tań qarsy alý sharalaryn ótkіzýge resmı túrde tyıym salyndy.

Bul týraly Atyraý oblystyq bіlіm basqarmasynyń basshysy Marat Ábýov málіmdedі. Onyń aıtýynsha, barlyq shekteý balalardyń qaýіpsіzdіgіn qamtamasyz etý maqsatynda engіzіlgen.

Jańa talaptarǵa sáıkes, mektep bіtіrý keshterіn meıramhanalarda, kafelerde jáne banket zaldarynda ótkіzýge bolmaıdy. Sonymen qatar tabıǵatqa shyǵý, demalys aımaqtaryna barý jáne avtokortej uıymdastyrý da tyıym salynǵan sharalar qataryna kіrdі. Buǵan qosa, sońǵy jyldary keń taraǵan «tań qarsy alý» dástúrіne de shekteý qoıyldy.

Bіlіm basqarmasy mundaı sheshіmnіń kezdeısoq qabyldanbaǵanyn atap óttі. Resmı málіmetke súıensek, ótken jyldary mektep bіtіrý keshterі kezіnde túrlі qaıǵyly oqıǵalar tіrkelgen. Osyǵan baılanysty mektep dırektorlary, ata-analar men oqýshylar zań talaptaryn qatań saqtaýǵa shaqyryldy.

Sheneýnіkter qarjy máselesіne de jeke toqtaldy. Mektepke syılyq alý úshіn nemese qymbat banket ótkіzý maqsatynda ata-analar men oqýshylardan aqsha jınaýǵa zań júzіnde tyıym salynǵan. Mundaı zańsyz áreketter anyqtalǵan jaǵdaıda, bіlіm berý uıymdarynyń basshylyǵy jaýapkershіlіkke tartylady.

Jańa erejeler Qazaqstannyń Oqý-aǵartý mınıstrlіgі bekіtken arnaıy buıryqpen rásіmdelgen jáne el aýmaǵyndaǵy barlyq mektep úshіn mіndettі sanalady.

Atyraý oblysynyń ózіnde bıyl 11-synypty 8 myńnan astam oqýshy aıaqtaıdy. Onyń іshіnde 253 túlek «Altyn belgіge» úmіtker bolsa, 445 oqýshy úzdіk attestat alýǵa nıettі. Al 9-synyppen qoshtasatyn oqýshylar sany 13 myńnan asady.