RUS
Бұл туралы ШЫҰ Бас хатшысы Чжан Мин Kazinform агенттігіне берген сұхбатында айтты.
Оның айтуынша, мәдени өзара іс-қимыл және туристік ынтымақтастық ШЫҰ-ға мүше мемлекеттер қызметінің басым бағыттарының бірі ретінде халықтарды жақындастыруға және дос елдердің экономикасын дамытуға жәрдемдесуде бірегей рөл атқарады.
«Өткен 2023 жыл «ШЫҰ туризм жылы» болып жарияланған еді. Қазіргі төраға – Қазақстан Республикасы мәдениет және туризм саласындағы ынтымақтастыққа үлкен мән береді. ШЫҰ туризм жылын өткізу жөніндегі іс-шаралар жоспары және «Алматы – ШЫҰ туристік және мәдени астанасы» бағдарламасын іске асыру жоспарымен 20-дан астам мәдени және туристік шара ұйымдастырылды. Оның ішінде ШЫҰ халықаралық туристік форумы, «Азия дауысы» халықаралық музыкалық фестивалі, Халықаралық қонақ үй форумы, Globe балеті, Шахматтан ШЫҰ кубогы бар», - деді Чжан Мин.
Бұл шаралар қазақстандық тараптың және тұтастай алғанда ШЫҰ-ның мәдени-туристік брендін қалыптастыруға ықпал етті, сондай-ақ ШЫҰ-ның мәдени-туристік ынтымақтастығын тереңдетуде маңызды рөл атқарды.
Өткен жылдың қараша айында ШЫҰ Хатшылығы Үрімші қаласында «ШЫҰ форумы 2023 – туризм жылы» жиынын өткізді. Бұл ШЫҰ елдері арасындағы туризм саласындағы өзара іс-қимылды дамыту және өңіріміздің туристік әлеуетін ашу жөніндегі бастамаларды талқылау үшін маңызды алаң болды.
«Биыл Алматы қаласында ШЫҰ-ға мүше мемлекеттердің туристік әкімшіліктері басшыларының кездесуі өтті, оған мен де қатыстым. Отырыста ШЫҰ туризм саласындағы 2024-2025 жылдарға арналған бірлескен іс-қимыл жоспары қабылданды, ол мүше мемлекеттер үшін туристік ынтымақтастық бағыттарын одан әрі ашу, зерделеу, тереңдету және жетілдіру жөніндегі нақты жол картасын білдіреді. Біз мүше мемлекеттердің бірлескен күш-жігерімен ШЫҰ-ның туристік ынтымақтастығы қарқынды дамитынына, ал халықтарымыз ШЫҰ ынтымақтастығының артықшылықтары мен тиімділігін сезінетініне сенімдіміз», - деді ШЫҰ хатшысы.