RUS
SMARTNEWS.KZ басылымының хабарлауынша, анасын іздеп жүрген Жәнібектің тағдырына байланысты жаңа бетбұрыс болды. Белгілі заңгер, тәжірибелі құқық қорғаушы Мейірман Шекеев баланың ісін өз қолына алды.
Бұл туралы қоғам белсендісі әрі тележүргізуші Қымбат Досжан әлеуметтік желідегі парақшасында жазды. Сондай-ақ істі ұзақ уақыттан бері бақылап жүрген журналист тергеу барысындағы негізгі кедергілерді ашық айтты.
Оның айтуынша, 2024 жылдың 31 қаңтарында ҚР Қылмыстық кодексінің 135-бабы, 3-бөлігі бойынша Арқалық қаласында қылмыстық іс қозғалғанымен, ол әлі күнге дейін сотқа жетпеген.
– Бір жылдың ішінде іс бірнеше мәрте тоқтатылып, қайта жанданды. Жәбірленуші ретінде менің көп нәрсені жарияламауыма тура келді. Бірақ сіздерге үнсіз отырғаным «ештеңе болып жатқан жоқ» дегенді білдірмейді, – деп жазды Қымбат Досжан.
Не белгілі болды?
2025 жылдың 9 маусымында қабылданған қаулыға сәйкес, тергеу аясында ондаған адамның ДНҚ үлгісі Жәнібекпен салыстырылған. Бір әйел 2002 жылы қаңтарда Арқалық перзентханасында босанғанын мойындап, қолхаттағы жазу өзінікі екенін растаған. Алайда екі рет жасалған ДНҚ сараптамасы бұл әйелдің Жәнібекке ешқандай туыстық қатысы жоқ екенін дәлелдеген. Бұл – Жәнібектің сол перзентханада дүниеге келгеніне күмән тудыруда.
Сонымен қатар, Жәнібек үшін 12 000 доллар алды деген күдікке ілінген азамат тергеу барысында күдікті емес, керісінше қорғалуға құқығы бар куә ретінде танылғаны белгілі болды. Бұл да қоғамда қызу талқыға түскен жайттардың бірі.
– Мәселе – жалғыз Жәнібектің кім екенін анықтауда ғана емес, жалпы бұл жүйеде не болғанында. Арқалықтағы перзентхана мен балалар үйінің басшылығы осы салада кеткен кемшіліктер үшін жауап беруі тиіс, – дейді Досжан.
Сонымен қатар, қазіргі уақытта Америкада тұрып жатқан, сол жылдары Арқалықтан асырап алынған тағы бір баламен Жәнібек ауысып кеткен болуы мүмкін деген нұсқа да тексерілуде.
Жаңа үміт – жаңа заңгер
Қымбат Досжан бұл істе енді Халық заңгері Мейірман Шекеевтің көмегіне жүгінетінін мәлімдеді:
– Жалғыз күресіп, талай кедергіге тап болдым. Енді Мейірман Қалмаханұлымен бірігіп, шындықты ашамыз деп сенемін. Біз әділ шешімді талап етеміз. Осы сәттен бастап іс бойынша нақты ақпарат тек менің, Жәнібектің және заңгеріміздің парақшасында жарияланады, – деді тележүргізуші.
Атышулы іс бойынша тергеу әлі жалғасып жатыр. Қоғам әділетті шешімді күтуде. Жәнібек кімнің баласы? Бұл сұрақтың жауабы алдағы уақыттың еншісінде. Ал Қымбат Досжан мен Мейірман Қалмаханұлы бұл жұмбақтың түйінін тарқатуға бекініп отыр.