RUS
SMARTNEWS.KZ басылымының хабарлауынша, Қаржы пирамидасы ісі бойынша сотталып, бес жылға бас бостандығынан айырылған вайнер Мейірхан Шерниязов мерзімінен бұрын бостандыққа шыққаннан кейін алғаш рет үн қатты.
Ол 5 шілде күні әлеуметтік желідегі парақшасында видео жариялап, елді мазалаған ең басты сұраққа жауап берді: “Неге тым ерте босап шықтың?”
“Біріншіден, түрмеде отыру оңай емес. Екіншіден, көп жерде мен туралы нақты емес ақпарат тарап кетті. Мені 2022 жылдың 19 сәуірінде ұстады, ал үкім 2024 жылдың 1 ақпанында заңды күшіне енді. Осы аралықтағы тергеу изоляторындағы әрбір күнім екі күнге тең саналды. Сондықтан есеп бойынша – мен жазамды толық өтедім. Не шартты түрде босау, не рақымшылық – ешқайсысы болмады”, – деді вайнер.
Айта кетейік, Мейірхан Шерниязов пен оның әріптесі Мейіржан Төребаев былтыр қаржы пирамидасын құрып, басқарғаны үшін кінәлі деп танылып, бес жылға сотталған болатын. Басқа фигуранттар сегіз жылдан он төрт жылға дейін бас бостандығынан айырылды. Іс бойынша келтірілген жалпы шығын көлемі – 814 миллион теңге, оған қоса 8 миллион теңге мемлекеттік баж салынған.
2024 жылдың желтоқсанында сот Шерниязовтың жаза мерзімін қысқарту туралы өтінішін қанағаттандырмаған. Алайда 2025 жылдың шілдесінде оның бостандыққа шыққаны әлеуметтік желіде үлкен сұрақтар туғызды.
“Біздің іс бойынша да сұрақ көп. Барлығын бірден айтып тастағым келмейді – бұл өзін ақтау сияқты көрініп кетуі мүмкін. Уақыты келгенде біртіндеп бөлісемін”, – деп уәде етті ол видеоүндеуде.
Бұған дейін ҚАЖ комитеті Шернияров пен Төребаевтың Павлодардағы колониядан Алматыға ауыстырылғанын хабарлаған. Бұған себеп – Алматыдағы түзету мекемесінде сотталғандар лимитінің ұлғаюы деп көрсетілген. Желтоқсан айында екі вайнер де жұмысқа орналасқаны хабарланды. Дегенмен Мейіржан Төребаев әлі босап шыққан жоқ.