RUS
SMARTNEWS.KZ басылымының хабарлауынша, Көкшетау тұрғыны өзінің Instagram парақшасында өзі мен құрбыларына қатысты орын алған қолайсыз жағдай жайлы бөлісті.
Айтуынша, олар таңғы уақытта көшеде келе жатқанда, бір топ жігітке жолығады. Кенеттен солардың бірі баршаның көзінше шешініп, қыздарға «Қараңдар!» деп айқайлайды.
«Шынымды айтсам, қарауға тұрмайды да. Жай ғана жиіркенішті әрі ұят. Біз не болып жатқанын түсінбей, шок болдық», – дейді бойжеткен.
Оқиға жұрт арасында үлкен резонанс тудырды. Әлеуметтік желі қолданушылары бұзақыны жауапқа тартуды талап етуде:
«Күлетін жағдай емес! Үйде не істесең де, ешкімнің шаруасы жоқ. Бірақ қоғамды мұндай масқарамен неге ыңғайсыз жағдайға қалдырасың?!», «Бет-жүзін жасырудың қажеті жоқ, халық өз «батырын» тануы керек!», - деп жазды олар.
Қалалық полиция басқармасы бұл деректі растады. Белгілі болғандай, ер адамның кім екені анықталған. Оған ҚР Әкімшілік құқықбұзушылық туралы кодексінің 434-бабы («Ұсақ бұзақылық») бойынша әкімшілік хаттама толтырылған.
Заңға сәйкес, мұндай бұзақылық үшін айыппұл салынуы немесе 10 тәулікке дейін әкімшілік қамауға алу қарастырылған.