RUS
SMARTNEWS.KZ басылымының хабарлауынша, 5 шілде күні Қарағанды облысында жантүршігерлік жол апаты тіркелді.
Kia Sedona көлігі Балқаш бағытымен келе жатып, Ақшатау ауылының маңында апатқа ұшырады. Алдын ала мәліметке сәйкес, көлік жүргізушісі жолдағы ережелерді елемей, алда келе жатқан көліктерді басып озбақ болып, жолдың жөнделіп жатқан бөлігіне шығып кеткен. Соның салдарынан көлік аударылып, лезде отқа оранған.
Оқиға орнында жеті жолаушы мерт болды. Жүргізуші мен тағы бір адам ауыр жарақат алып, жақын маңдағы медициналық мекемеге жеткізілді. Бұл туралы Қарағанды облысы Полиция департаментінің Тергеу басқармасының бастығы Азамат Ахметов хабарлады.
Қазір апатқа қатысты Қылмыстық кодекстің 345-бабы бойынша іс қозғалып, оқиғаның себеп-салдарын анықтауға арналған сараптамалар тағайындалды. Тәртіп сақшылары жол қозғалысы ережелерін елемеудің салдары тым ауыр болатынын тағы бір мәрте еске салып отыр.
«Жүргізушілерге ескертуіміз — жол ережелерін қатаң сақтау керек. Жылдамдықты асырмау, демалысты дұрыс жоспарлау, арнайы автотұрақтар мен кемпингтерді пайдалану адам өмірін сақтап қалуы мүмкін», — деді полиция өкілдері.