RUS
SMARTNEWS.KZ басылымының хабарлауынша, Жапонияда балалардың ең сүйікті кітаптарының бірі - Ёсико Кояманың «Сиқырлы орындық» кітабын «Атамұра» баспасы аударып, басып шығарып, Алматыда Жамбыл атындағы қалалық жасөспірімдер кітапханасында көпшілікке таныстырды.
«Dozo no isu» кітабы – алғаш рет 1981 жылы басылып, әлемнің 50-ден астам тіліне аударылған. Оны қазақ тіліне Жапония азаматы Фарида Кишимото аударған.
Кітап балаларды ізгілік пен мейірімділікке, бір-біріне қамқор болуға тәрбиелейді.
Жапония баспасы өкілдерінің атынан жиынға Чика Канно мен ұлы Котаро қатысты. Мектеп жасына дейінгі балалар мен олардың ата-аналарына арнап кітаптың қазақ және жапон тілдеріндегі нұсқаларынан үзінділер оқылды, сондай-ақ таныстырылымға қатысып отырған жас оқырмандар да ертегі туралы пікірлерін тыңдап, ой бөлісті.
«Атамұра» корпорациясының вице-президенті Рахима Абрарқызы осы күні көптеген шетелдік танымал баспаханалармен өзара әріптестік меморандумдары бар екені, болашақта “Атамұра” баспасының халықаралық деңгейдегі байланыстары арта түсетіні туралы атап өтті. Баспа кітапханаға өздері шығарған 75 кітапты сыйға тартты.