RUS
SMARTNEWS.KZ басылымының хабарлауынша, белгілі продюсер және тележобалар авторы Баян Мақсатқызы соңғы уақытта күйеуі Тұрсен Алагөзовке қатысты айтылған айыптауларға жауап берді. Ол өзінің Instagram парақшасында жазба жариялап, күйеуі мен отбасын қаралап, жала жауып жүргендерге ескерту жасады.
Еске сала кетейік, кәсіпкердің бұрынғы жұбайы Ляйсира Маратқызы бұған дейін мәлімдеме жасап, Тұрсен Алагөзов “Сатыбалдыларды пайдаланып, отбасылық бизнесімізді тартып алды” деп айыптаған болатын.
Алайда Баян Мақсатқызы бұл мәлімдемелерді жоққа шығарып, жала жауып жүргендерге жауап қатты:
“Негатив жазғандарды оқығым да, естігім де келмейді. Отбасыма, күйеуіме, қыздарыма қатысты негатив болса, үнсіз қала алмаймын. Хэйтерлер, сендерге айтарым, сендерге мың алғыс! Сендер негатив дүние айтқан сайын, жазған сайын біздегі жаман энергия азайып, кәдімгідей жеңілдеп қалдық. Сендердің өтіріктерің, жалаларың, жанталасып бізді жамандап жатқандарың өздеріңе қара энергия болып, өздеріңе барып жабысады. Сендер бізге күйе жаққан сайын, біздің жолымыз ашылып, әр қадамымыз сәттілікке толып жатыр”, – деп жазды продюсер ашу мен өкпесін жасыра алмай.
Сонымен қатар, ол қажет болған жағдайда қолында бар құжаттар мен нақты дәлелдерді ашық түрде жариялауға дайын екенін айтты:
“Күйеуім Тұрсенге, бізге қатысты айтқан өтіріктерің ашылып, масқара боласыңдар. Сөйлесем, менде де тіл бар. Тілім ащы. Егер тынышталмасаңдар, қолымда бар бүкіл құжат-дәлелдерді жариялаймын. Кім кімге, қашан, не деп барғаны, не істегені, не сұрағаны туралы тірі куәгер ретінде айтып бере аламын. Сондықтан ашықтан-ашық өтірік айтуды қояйық”, – деп ескертті ол.
Желі қолданушылары арасында пікір екіге бөлінген. Бірі продюсерді қолдаса, енді бірі оны асыра сілтеп отыр деп бағалауда. Ал Баян Мақсатқызы болса, отбасының абыройын қорғау үшін аянып қалмайтынын ашық білдіріп отыр.